Пасля патопу асфальт на дарогах Менска праваліўся ўжо ў 8 месцах

Тратуар на вуліцы Маскоўскай ператварыўся ў сцежку з перашкодамі. З-за правалу цеплакамеры дарожнае пакрыццё сышло пад зямлю.

Як паведамляе тэлеканал СТВ, на мяжы з праезжай часткай утварылася западзіна метровай глыбіні.

Стыхійны катлаван дарожныя службы агарадзілі металічным плотам. У найбліжэйшыя дні яму прадыягнастуюць супрацоўнікі Менскіх цепласетак, і асфальт запламбіруюць.

Усяго ж, пасля затаплення на сталічных вуліцах прыйшлося ліквідаваць 8 падобных правалаў. Вывучаць найбольш праблемныя ўчасткі гарадскіх магістраляў цяпер будуць спецыяльныя дарожныя камісіі.

Нагадаем, што пасля патопу ў Менску 29 ліпеня ў Менску на вуліцы Аэрадромная пад зямлю праваліліся дзве паласы руху. Прычынай правалу часткі дарогі назвалі праліўныя дажджы, якія падмылі грунт.