Беларускі дыктатар: «Нам не па дарозе з ніводнай дзяржавай»
45- 2.09.2009, 15:51
Аляксандр Лукашэнка зноў заявіў, што не збіраецца праводзіць дэмакратызацыю ў краіне.
Падчас працоўнай паездкі ў Гомельскую вобласць беларускі кіраўнік заявіў, што будзе развіваць партнёрскія стасункі як з Расеяй, так і з Захадам.
«Развароту, павароту няма і быць ня можа. (…) У нас шматвектарная вонкавая палітыка, а усё астатняе - гэта пустыя выдумк», -- перадае слова Аляксандра Лукашэнкі «Радыё Свабода».
«Расея была і будзе брацкай, роднай нам дзяржавай. А Захад - гэта высокатэхналагічны цэнтр, нашы суседзі, там палова нашага тавараабароту. І гэтым усё сказана», -- сказаў Лукашэнка.
Ён лічыць магчымым уступленне ў Сусветную гандлёвую арганізацыю саюзам «трох»– Беларусі, Расеі, Казахстану.
«Пажывём - пабачым. Калі атрымаецца, што заплпнавана, то будзе выдатна (…) Нават калі мы не ўступім пакуль у СГА, то нам усё роўна выгадны гэты мытны саюз», -- заявіў беларускі кіраўнік.
Лукашэнка сказаў таксама пра праблемы з Захадам.
«Калі з Расеяй у нас няма практычна ніякіх глабальных праблем, то з Захадам вы ведаеце нашыя адносіны (...) Хоча Захад з намі супрацоўнічаць паводле прынцыпаў, на якіх ён супрацоўнічае з іншымі дзяржавамі, — то мы з задавальненнем будзем гэта рабіць», -- заявіў Лукашэнка.
«Што для нас непрымальна, то я ўжо сказаў: калі хочуць разбурыць краіну і зламаць той курс, які ў Беларусі праводзіцца, то нам не па дарозе з ніводнай палітычнай сілай, з ніводнай дзяржавай», -- — зазначыў Лукашэнка.
Нагадаем, што ў лістападзе сканчваецца выпрабавальны тэрмін, дадзены беларускім уладам Еўразвязам. У лістападзе, у залежнасці ад сітуацыі з дэмакратыяй у Беларусі, будзе вырашацца пытанне падаўжэння ці прыпынення санкцый ЕЗ у дачыненні да беларускага рэжыма. Улады Беларусі мусяць вызваліць палітвязняў, спыніць рэпрэсіі супраць апазіцыі, даць свабоду СМІ і няўрадавым арганізацыям, унесці змены ў Выбарчы кодэкс, каб у краіне стала магчыма правесці свабодныя і дэмакратычныя выбары. Ніводная з гэтых умоў дагэтуль не выканана.