Польскія ўлады выбачыліся перад беларускімі футбольнымі юніёрамі

Бурмістр паўночнага польскага горада Ілава, дзе знаходзіцца юніёрская зборная Беларусі па футболе, прынёс прабачэнні за ганебныя паводзіны сваіх суайчыннікаў.

Па інфармацыі прэс-службы Беларускай федэрацыі футбола, інцыдэнт адбыўся 23 верасня, калі каманда пасля перамогі над польскімі аднагодкамі (1:0) выправілася на вечаровую прагулку, паведамляе БелаПАН.

«Некалькі польскіх падлеткаў, якія знаходзіліся ў стане алкагольнага ап’янення, сваімі паводзінамі справакавалі рэакцыю ў адказ з боку беларускіх непаўнагадовых футбалістаў, — кажацца ў паведамленні. — Усе ўдзельнікі і сведкі канфлікту далі тлумачэнні супрацоўнікам праваахоўных органаў. Ніякіх пытанняў і прэтэнзіяў з боку мясцовых уладаў да беларускай зборнай не ўзнікла. Пра гэта сведчыць і той факт, што сёння ў гатэль, дзе размяшчаецца наша каманда, прыязджаў бурмістр Ілавы, які выбачыўся за ганебныя паводзіны сваіх юных суайчыннікаў».

Прэс-служба БФФ адзначае, што польскі бок, які запрасіў зборную Беларусі для правядзення таварыскіх матчаў, «быў абавязаны забяспечыць бяспеку гульцам і агарадзіць іх ад магчымых інцыдэнтаў».

25 верасня юніёрскія зборныя Беларусі і Польшчы сустрэнуцца зноў.