Затрыманы тэлефонны тэрарыст, які пагражаў падарваць цягнік
10- 6.01.2010, 11:22
Зараз затрыманага дапытваюць супрацоўнікі Камітэта дзяржбяспекі.
Супрацоўнікі КДБ Беларусі затрымалі зламысніка, які пагражаў мінулай ноччу падарваць цягнік № 30 Калінінград-Масква, паведаміў «Інтэрфаксу» начальнік прэс-службы УУС Калінінградскай вобласці палкоўнік Вячаслаў Багуцкі.
«У дадзены момант супрацоўнікі КДБ Беларусі працуюць з затрыманым грамадзянінам. Яны высвятляюць матывы яго тэлефанавання, у якім зламыснік заявіў пра намер падарваць цягнік», - паведаміў Багуцкі.
Паводле яго словаў, у сувязі з затрыманнем падазраванага супрацоўнікамі КДБ Беларусі дадзены адбой «трывогі», абвешчанай ва ўсіх сілавых структурах Калінінградскай вобласці.
Нагадаем, што ў сувязі з ананімным званком пра магчымы выбух цягніка Калінінград-Масква 574 пасажыры былі эвакуіраваныя ў горадзе Орша (Беларусь) у ноч на сераду.
Міліцыя і выратавальнікі ачапілі тэрыторыю, даследавалі састаў на прадмет выяўлення выбуховай прылады, аднак нічога знойдзена не было.
Рух цягніка быў затрыманы на 2 гадзіны 11 хвілін, затым усе пасажыры былі адпраўленыя ў Маскву на тым жа цягніку.
