Паседжанне гарадской камісіі - «дзяржаўная таямніца»
3- 1.10.2010, 10:16
«Адкрыта і галосна» пачала сваю працу Баранавіцкая гарадская тэрытарыяльная выбарчая камісія.
30 верасня адбылося першае паседжанне Баранавіцкай гарадской тэрытарыяльнай выбарчай камісіі, якое, па сутнасці, было таемным. Інфармацыі пра яго ў дзяржаўнай газеце «Наш край» не было, па тэлефоне даведацца таксама было немагчыма, паведамляюць «Праваабаронцы за свабодныя выбары».
На працягу дня праваабаронцы спрабавалі «раскрыць гэтую дзяржаўную таямніцу», але безвынікова – дарма прадстаўнік БХК Карней Пятровіч хадзіў на прыём у арганізацыйна-кадравы аддзел. Прадстаўнік ТБМ Сяргей Гоўша таксама ўвесь дзень тэлефанаваў у гэты аддзел выканкама, але тэлефон не адказваў. У ідэалагічнай службе таксама «не ведалі», дзе і калі адбудзецца першае паседжанне камісіі. Сакратар прыёмнай гарвыканкама адказала Гоўшы, што загадчыца арганізацыйна-кадравай службы Вольга Дудко пайшла ў паліклініку. А калі намеснік старшыні гарвыканкама Дзмітры Касцюкевіч даведаўся, што Сяргей Гоўша рыхтуе скаргу ў ЦВК, дык паведаміў, што загадчыца арганізацыйна-кадравай службы Вольга Дудко знаходзіцца на паседжанні гарадской выбарчай камісіі.
Вось так «адкрыта і голасна» пачала сваю працу Баранавіцкая гарадская тэрытарыяльная выбарчая камісія.
