ДзяржСМІ баяцца нават назваць прэтэндэнтаў на прэзідэнцкую пасаду

Бабруйскія газеты ад 13 кастрычніка выйшлі з матэрыяламі на выбарчую тэматыку.

У № 41-м недзяржаўнай газеты «Камерцыйны кур’ер» (гэта газета з самым вялікім накладам у горадзе ў 15322 асоб.) Апублікаваў матэрыял «У падтрымку Прэзідэнта». У ім аўтар Галіна Чырук распавядае пра збор подпісаў, праведзены ў скверы кінатэатра «Таварыш» членамі ініцыятыўнай групы Аляксандра Лукашэнкі. Пры гэтым пра ініцыятыўныя групы апазіцыйных прэтэндэнтаў, якія штодня збіраюць подпісы каля лазні на вуліцы Менскай і кожныя выходныя на рынкавай плошчы - ні слова, паведамляюць «Праваабаронцы за свабодныя выбары».

Артыкул пад назвай «Колькі будзе кандыдатаў?» надрукаваны ў № 81-м газеты гарвыканкама «Бабруйскае жыццё». Яе аўтар Аляксандр Цімафееў піша, што «пікеты размяшчаюцца ў найбольш людных гарадах і кожны выбаршчык мае магчымасць паставіць свой аўтограф у падтрымку таго ці іншага прэтэндэнта». Але прозвішчы гэтых прэтэндэнтаў, зноў жа, не называюцца. Затое ў гэтым жа артыкуле пазначана, што за Лукашэнку сабрана больш за 600 тысячаў подпісаў. «Лічба гэтая напэўна павялічыцца, людзі ідуць, каб падтрымаць Аляксандра Лукашэнку. У тым ліку і ў горадзе на Бярэзіне» - рэзюмуе Аляксандр Цімафееў.