Загінула паэтка Тацяна Сапач

Тацяна Сапач і яе муж Сяргей Дубавец трапілі ў аўтакатастрофу.

Аварыя здарылася на тэрыторыі Літвы ўначы на 28 сьнежня. Сям'я вярталася ад дачкі, якая нядаўна нарадзіла ім унучку.

Сяргей Дубавец трапіў у шпіталь з траўмамі, яго жонка Тацяна загінула, паведамляе "Радыё Свабода".

Сястра Дубаўца Алена распавяла БелаПАН, што ДТЗ адбылося за 100 кілямэтраў ад Вільні, каля 22.00 27 сьнежня.

За рулём машыны знаходзіўся Дубавец, жонка сядзела побач. Аўтамабіль рухаўся на невялікай хуткасьці, прыкладна 80 км/г, але з-за галалёду яго занесла на сустрэчную паласу, дзе ён сутыкнуўся з грузавіком.

Рэдакцыя www.charter97.org выказвае глыбокія спачуваньні Аделі і Сяргею Дубаўцу.

-------------------------

Тацяна Сапач
Паэтка, журналістка, перакладчыца.

Нарадзілася 26 жніўня 1962 году ў вёсцы Маркава (Маладэчанскі раён).

Скончыла журфак БДУ.

Заснавальніца і аўтарка культуралягічнай праграмы "Альбаросіка" на Беларускім радыё (1987-89).

Супрацоўніца радыёстанцыі "Балтыйскія хвалі" (2000-2001).

Адна з аўтарак перадачы "Палітычная геаграфія" на Радыё Свабода.

Рэдактарка і аўтарка праграмы "Віленскі сшытак" на Літоўскай нацыянальнай тэлевізіі (з 1991).

Аўтарка літаратурных перакладаў зь літоўскай і польскай моваў.

У 1992 годзе выйшаў зборнік паэзіі "Восень". У 2008 — "Няхай не пакіне нас восень".

Удзельніца праекту Радыё Свабода "Начная чытанка" (2007)