Каму выгадная смерць Алега Бябеніна?

Пракуратура Менскай вобласці адмовілася ўзбуджаць крымінальную справу па факце смерці журналіста Алега Бябеніна.

Сябар Алега Бябеніна Фёдар Паўлючэнка на сайце Electroname.com піша пра тое, каму выгадная смерць заснавальніка сайта charter97.org.

Прайшло тры месяцы з дня трагічнай смерці Алега Бябеніна. Алег быў маім сябрам. Увесь гэты час я думаю пра гэта і боль ад страты не пакідае ні на дзень. Баюся нават падумаць, што перажылі і перажываюць жонка і бацькі. Самае простае - маўчаць, забыцца і засунуць усё далей, жыццё не стаіць на месцы. Але тое, што Алега няма, не дае жыць спакойна. Я ўжо пісаў і казаў не адзін раз - не веру ў самагубства. Гэта не словы роспачы, быў час падумаць, і чым больш я супастаўляю факты, тым менш у мяне сумневаў. А сумневаў, паверце, было дастаткова. Кожны чалавек бывае слабы, мы ўсе не застрахаваныя ад маладушнасці. Але ўсё гэта не пра Алега.

За тры месяцы я некалькі разоў даваў тлумачэнні ў пракуратуры, размаўляў з экспертамі АБСЕ, са знаёмымі і калегамі Алега. У нейкі момант падалося, што відавочныя рэчы будуць пачутыя і пракуратура хаця б паспрабуе стварыць бачнасць расследавання. Але як паведаміў намеснік пракурора Менскай вобласці Мікалай Пілянкевіч, для іх усё зразумела. Зразумела для іх было і тры месяцы таму, падчас першага майго допыту. Абурае не гэта. Адкрыццяў пракурорскіх працаўнікоў, якія працуюць пры дыктатуры, я не чакаў. Ды яны і самі асасбліва не хавалі, што астатнія версіі іх не цікавяць. Пасля трагедыі ўзнікла паўза - страх, замяшанне, разуменне таго, што мы сталі жыць у іншай краіне. У першыя хвіліны выгаварыліся ўсе, хто меў смеласць, а далей пустэча, якую пачаў запаўняць «бруд». І чым далей, тым больш гэтага бруду вылівалася. Прыадкрыў шлюз (чаму я не здзіўлены) сам Аляксандр Рыгоравіч - блытаўся ў паказаннях, называў гэта то «самагубствам», то «крымінальным злачынствам». Беларускае тэлебачанне на ўсе лады інтэрпрэтавала версію.

Але шокам асабіста для мяне стала так званае расследаванне інфармацыйнага агенцтва «БелаПАН», якое недвухсэнсоўна зрабіла выснову, што да смерці Алега датычныя яго калегі.

Па спецыфіцы сваёй працы я штодня сачу за інфармацыйнай карцінай дня ў Беларусі і магу дакладна сказаць, што менавіта паслужыла нагодай для напісання таго ці іншага артыкула. Апошнія паўгады з цікавасцю сачу за інфармацыйнымі «злівамі» журналіста праекта кампаніі БелаПАН «Беларускія навіны» Віктара Федаровіча. Журналіст звярнуў на сябе ўвагу тым, што нязвыкла для беларускіх рэаліяў дасведчаны пра ўсе канфлікты і «творчы» шлях самага адыёзнага паплечніка Лукашэнкі - Віктара Шэймана. Чыноўнік, які патрапіў у няласку, дзякуючы сайту «Беларускія навіны» і Віктару Федаровічу больш за паўгады нагадвае пра сябе і трывала займае першае месца ў навінах, якія ў сваю чаргу з задавальненнем рэтранслюе найбуйнейшы партал краіны TUT.by. Мала таго, Віктар Федаровіч знаходзіцца «на піку разборак» сілавых структураў па справе паплечніцы Шэймана - Святланы Байкавай. Яго нават запрасілі ў Генпракуратуру для давання тлумачэнняў.

І менавіта Віктар Федаровіч становіцца тым «выкрывальным рупарам», які зрывае «покрывы таямніцы» ў справе Алега. Журналіст проста ўзяў і скляпаў адрывістыя факты, здагадкі і фрагменты расследавання пракуратуры (адкуль яны ў звычайнага журналіста?) так, як трэба. А трэба каму?

Як не ўздаць артыкул паважанай мной Святланы Калінкінай, якая паспрабавала высунуць версію «каму выгодна» ў справе Алега і адразу ж атрымала пагрозы ў свой адрас. Нагадаю, паводле версіі журналісткі, менавіта Віктару Шэйману магла быць выгодная смерць Алега. Напалоханы Лукашэнка павінен быў вярнуць гнанага сілавіка ў сваё кола (гэта і здарылася - Шэйман фактычна стаў кіраўніком перадвыбарчага штаба).

Падчас другога допыту ў пракуратуры я спрабаваў звярнуць увагу следчага на гэтыя факты, але мяне слухаць не хочуць. Застаецца адна магчымасць - праз інтэрнэт, праз мой сайт і праз чытачоў данесці гэтыя асцярогі. Спадзяюся, калі-небудзь, пасля змены ўлады ў нашай краіне, на гэтыя дзіўныя рэчы незалежныя следчыя звернуць увагу.