У апытанні пра любімага беларускага выканаўцу перамог «ніхто»
11- 22.02.2010, 9:26
А вось самы папулярны гурт у беларусаў ёсць - нязменныя «Пясняры».
Шоў-бізнэс у Беларусі, можа, і ёсць, а вось сваіх зорак пакуль не вырасла. Эксперты правялі па ўсёй краіне маштабнае апытанне пра тое, якія брэнды ёсць у беларусаў у літаратуры, архітэктуры… Патрапілі ў апытанне і музыкі. Дакладней, не патрапілі: першае і другое месца ў апытаннях пра выканаўцаў заняў адказ «нікога не ведаю», паведамляе «Комсомольская правда в Беларуси».
- Калі б папрасілі не абраць варыянт, а назваць самім, было б яшчэ горш! - лічыць рэкламіст, аўтар рэкламных канцэпцыяў і брэндаў Юлія Ляшкевіч. - Думаю, назвалі б «Пясняроў», Паплаўскую і Ціхановіча - гэта памяць яшчэ з Савецкага Саюза, калі іх паказвалі па цэнтральным тэлебачанні, кружэлкі выходзілі велізарнымі тыражамі… Асобная аўдыторыя ўзгадала б рок-гурт N.R.M. Адзначу адзін цікавы момант: прынцыпова розныя стартавыя пазіцыі нашых зорак. Калі казаць пра рок-гурты, дык трэба ўзгадаць падполле, у якім яны існавалі. На адных была забарона, іншыя лічыліся «нефарматам». Нядзіўна, што іх ведаюць мала. А вось з поп-выканаўцамі зусім іншая гісторыя! У іх і 75% на радыё, і эфіры на тэлебачанні… Атрымліваецца, адны недасягальныя, іншыя гучаць адусюль, а вынік - аднолькавы! Калі пры пастаянным пасоўванні, нават навязванні, людзі ўсё роўна не ведаюць поп-выканаўцаў, паўстае пытанне якасці. Яны безаблічныя, нецікавыя, вось іх і не запамінаюць. У нас з вамі ў жыцці і без таго праблемаў хапае, каб запамінаць тое, што не чапляе.
Ваш любімы беларускі выканаўца?
Поп-выканаўцы
Нікога не ведаю - 38,3%
Ядзвіга Паплаўская - 8,01%
Аляксандр Ціхановіч - 7,94%
Ірына Дарафеева - 7,57%
Алеся - 7,47%
Іна Афанасьева - 6,89%
Анатоль Ярмоленка - 5,67%
Уладзімір Мулявін - 5,02%
Анжаліка Агурбаш - 4,22%
Аляксандр Саладуха - 3,76%
Дзмітры Калдун - 3,18%
Пётр Ялфімаў - 2,8%
Рок-гурты
«Песняры» - 39,78%
Нікога не ведаю - 26,6%
«Сябры» - 17,68%
«Верасы» - 8,05%
«Цягні-Штурхай» - 4,68%
«J_Морс» - 4,27%
«Ляпіс Трубяцкі» - 3,86%
N.R.M. - 1,58%
«Бяседа» - 1,26%
«Харошкі» - 1,19%