Нацбанк перавядзе бізнес толькі на безнаяўныя разлікі?

Нацыянальны Банк Беларусі атрымаў права вызначаць не толькі парадак, але і памер разлікаў наяўнымі паміж юрасобамі (індывідуальнымі прадпрымальнікамі).

Адпаведны ўказ № 111 быў падпісаны 1 сакавіка 2003 года, паведамляе АФН.

Згодна з дакументам, пункт 4 указу № 359 ад 2000 года варта чытаць у наступнай рэдакцыі:

«Разлікі паміж юрыдычнымі асобамі, іх адасобленымі падраздзяленнямі, індывідуальнымі прадпрымальнікамі ў Рэспубліцы Беларусь ажыццяўляюцца ў беларускіх рублях наяўнымі грашовымі сродкамі ў парадку, у тым ліку памерах, вызначаных Нацыянальным банкам».

Новыя паўнамоцтвы дазволяць Нацбанку з часам рэалізаваць сваю ідэю аб пераходзе на разлікі паміж юрасобамі толькі ў безнаяўнай форме. У тых выпадках, калі выкарыстанне плацёжных даручэнняў (патрабаванняў і г.д.) будзе тэхнічна немагчымым або немэтазгодным, Нацбанк будзе настойліва раіць выкарыстанне банкаўскіх (пластыкавых) картак.