На Дзень незалежнасці Літвы запрасілі Станіслава Шушкевіча

Запрашэнне наведаць урачыстасці ў Вільні 11 сакавіка накіраваў першаму кіраўніку незалежнай Беларусі Станіславу Шушкевічу Сейм Літвы.

«Я маю самае прамое дачыненне да тых гістарычных падзеяў у Літве. У гэты перыяд у 1990 годзе я быў першым намеснікам старшыні Вярхоўнага Савета Беларусі, і ў нас у парламенце ішлі дэбаты, як ацэньваць тое, што адбываецца ў суседняй краіне. У Вільню была накіраваная дэлегацыя Вярхоўнага Савета, старшынём якой быў я.

Я быў у асаджаным парламенце. Там нават ёсць стэнд, які ўвесь час дзейнічае, з маёй фатаграфіяй у Сейме. Я ведаю большасць дэпутатаў, якія падпісалі Акт аб незалежнасці Літвы. У нас даўнія кантакты і сувязі, адзінства падыходаў у разуменні таго, што такое быў пакт Молатава-Рыбентропа, як пачыналіся Другая сусветная вайна. І я ганаруся, што на свята 11 сакавіка мяне запрасіў не хто-небудзь, а Сейм Літвы», - адзначыў экс-старшыня Вярхоўнага Савета Беларусі Станіслаў Шушкевіч у інтэрв'ю сайту charter97.org.

Узгадваючы падзеі 20-гадовай даўніны, палітык кажа: «Ніколі не забудуся, як мяне везлі па лабірынце ў асаджаны Сейм: вас завозяць, як у кіно ў канцэнтрацыйныя лагеры. Напярэдадні, у студзені, калі народ паўстаў, там загінулі людзі … Мы ўскладалі кветкі на магілы загінулых герояў. Свабода далася Літве чалавечымі ахвярамі, і яны былі салідарныя.

У нашай дэлегацыі былі тры розныя меркавання. У мяне ўмеранае, у гісторыка Грыцкевіча – у падтрымку літоўскіх дэпутатаў (як гісторык ён добра разумеў усё, што адбываецца), а дэпутат–ветэран Шарапаў лічыў, што мае рацыю кампартыя Літвы і трэба ісці гэтым курсам. Але з'ехалі адтуль мы ўсе перакананыя, што літоўскія парламентары, якія падпісалі Акт аб незалежнасці, пайшлі па правільным шляху. Грамадзяне Літвы заваявалі права быць свабоднымі», - заявіў Станіслаў Шушкевіч.