«Шахцёр» аштрафавалі за выказванні галоўнага трэнера

Салігорскі хакейны клуб «Шахцёр» аштрафаваны на 30 базавых велічыняў (1 млн. 50 тыс. рублёў) рашэннем дысцыплінарнага камітэта Федэрацыі хакея.

Пра гэта піша БелаПАН са спасылкай на прэс-службу ФХРБ.

Штраф накладзены за парушэнне дысцыплінарнага кодэкса рэгламенту правядзення адкрытага чэмпіянату Беларусі. «Такім парушэннем дысцыплінарны камітэт палічыў выказванні галоўнага трэнера каманды Андрэя Гусава ў дачыненні судзейства на пасляматчавай прэс-канферэнцыі 28 сакавіка», - адзначаецца ў паведамленні.

28 сакавіка ў Салігорску «Шахцёр» прайграў менскаму «Юнацтву» чацвёрты матч фіналу - 2:3, пасля чаго агульны кошт серыі да чатырох перамогаў стаў роўным - 2:2. Пасля заканчэння сустрэчы Гусаў раскрытыкаваў дзеянні арбітраў, заклікаўшы іх «больш салідна і сур'ёзна ставіцца да нюансаў».