Сусветныя СМІ: Беларускі дыктатар ухваліў злачынства Бакіева

Вядучыя замежныя СМІ пракаментавалі прадастаўленне Лукашэнкам прытулку экс-прэзідэнту Кыргызстана.

Каментуючы ўчарашнюю заяву беларускага кіраўніка аб прытулку для экс-прэзідэнта Кыргызстана і яго сям'і ў Менску, амерыканскае выданне The New York Times прагназуе: цяперашняя прысутнасць Бакіева ў Беларусі можа спрыяць яшчэ большай ізаляцыі Беларусі і яе аўтарытарнага кіраўніка Лукашэнкі, які нярэдка ідзе на супрацьстаянне з Захадам і суседняй Расеяй, перадае «Радыё Свабода».

Рашэнне Лукашэнкі выглядае як выпад супраць Расеі, якая адыграла частковую ролю ў тым, каб падрыхтаваць глебу для звяржэння Бакіева. Акрамя таго, сам факт прадастаўлення прытулку можа істотна пашкодзіць адносінам паміж Беларуссю і Кыргызстанам.

Як піша аглядальнік выдання Марк Швірц, у гэтай сувязі тэрмін знаходжання ў Беларусі звергнутага кіргізскага прэзідэнта застаецца незразумелым.

Аляксандар Лукашэнка - адзіны кіраўнік на постсавецкай прасторы, які адкрыта стаў на бок Курманбека Бакіева і, па сутнасці, ухваліў яго загад, аддадзены 8 красавіка - страляць па дэманстрантах. Гэты загад абышоўся ў 80 чалавечых жыццяў, піша нямецкае выданьне Sudwest Presse. Акрамя таго, у Менску выказваюць падазрэнні, што за звяржэннем Бакіева стаяць расейскія спецслужбы.

У той час як ад самога Бакіева, які цяпер знаходзіцца ў Менску, не зыходзіць рэальнай небяспекі, а часовы кіргізскі ўрад запэўнівае, што падзеі знаходзяцца пад кантролем, сітуацыя ў краіне па-ранейшаму застаецца напружанай. Як адзначае Sudwest Presse, «Кыргызстанам кіруе хаус». І прававыя нормы, і гандаль, і гэтак далей - усё гэта па-ранейшаму дыктуе вуліца.

У сваю чаргу, намеснік старшыні часовага ўрада Кыргызстана, міністр фінансаў Тэмір Сарыеў звярнуўся сёння праз СМІ да экс-прэзідэнта Курманбека Бакіева з заклікам «паўплываць на сваіх прыхільнікаў і спыніць беспарадкі».

Па словах Сарыева, рашэнне Лукашэнкі пра прытулак для Бакіева - гэта выбар беларускага кіраўніцтва.

«Сапраўды, Бакіеў заняў пасаду прэзідэнта народнымі намаганнямі. Але ён зрабіў шэраг сур'ёзных недахопаў: пачаў усталёўваць аўтарытарны рэжым, спрыяў развіццю карупцыі, нарэшце, загадаў страляць у людзей », - заявіў намеснік старшыні часовага ўрада.

Як мяркуе Сарыеў, Курманбек Бакіеў павінны зрабіць высакародны ўчынак: звярнуцца да сваіх прыхільнікаў, каб тыя спынілі распальванне хаусу і беспарадкаў на поўдні і поўначы краіны. «У любым выпадку часовы ўрад будзе ўсталёўваць згоду на аснове шырокай падтрымкі насельніцтва», - адзначыў Тэмір Сарыеў.

Між тым сітуацыя ў рэгіёне застаецца напружанай.

Як паведамляе Voice of America, прэзідэнт Узбекістана Іслам Карымаў, які знаходзіцца ў Маскве з афіцыйным візітам, заявіў, што «цяперашнія падзеі ў Кіргізстане ўяўляюць небяспеку для ўсіх суседніх краін».