На сустрэчы з Януковічам Лукашэнка зноў папракаў Расею

Беларускі кіраўнік папрасіў «не напружвацца» іншых з нагоды развіцця беларуска-украінскага супрацоўніцтва.

«Справа ў тым, што сёй-той напружвацца з нагоды нашых адносін, мы не збіраемся нікога напружваць. Беларусь не збіраецца займацца геастратэгічнымі праблемамі, гэта не ў нашых інтарэсах. Думаю, і не ў інтарэсах Украіны таксама», - заявіў Лукашэнка, падчас сустрэчы ў Менску з прэзідэнтам Украіны Віктарам Януковічам, які прыбыў з рабочым візітам, перадае «Інтэрфакс».

Лукашэнка адзначыў, што кіраўніцтва дзвюх краін павінна прыкласці ўсе намаганні для таго, каб «нашы людзі жылі годна, каб мы не адрозніваліся ад еўрапейскіх дзяржаў, з якімі мы мяжуем, а таксама ад далёкіх дзяржаў».

Беларускі кіраўнік сказаў, што «з нагоды сённяшняга візіту асобныя дыпламаты і журналісты разразіліся, што візіт хутка арганізаваны, што праграмы няма, павесткі няма». У гэтай сувязі Лукашэнка патлумачыў, што пасля сустрэчы двух прэзідэнтаў падчас інаўгурацыі Януковіча, было дадзена даручэнне ўрадам, экспертам, напрацаваць пытанні, якія маюць патрэбу ў вырашэнні кіраўнікоў дзяржаў. «Напрацаваць пытанні і распрацаваць нейкую дарожную карту ў адносінах Беларусі і Украіны», - адзначыў ён.

Акрамя таго, падкрэсліў ён, «у нас, напэўна, няма такіх праблем як, напрыклад, Чарнаморскі флот». «Гэта больш сказана тым, хто спрабуе пагуляць на гэтай тэме», - заявіў Лукашэнка.

Ён выказаў надзею, што «у бліжэйшай будучыні мы знойдзем час яшчэ не аднойчы сустрэцца, у тым ліку і на мяжы».

«У нас заўсёды былі, ёсць і будуць пытанні, якія трэба ўрэгуляваць ў нашых адносінах. Пытанні, якія прадстаўляюць інтарэс для нашых дзяржаў», - адзначыў у сваю чаргу Януковіч. Украінскі прэзідэнт сказаў, што ў двухбаковых адносінах ёсць таксама пытанні, «з пункту гледжання абароны нашых агульных інтарэсаў у трэціх краінах». «Мы заўсёды будзем шукаць магчымасць аб'яднацца, каб абараніць нашы нацыянальныя інтарэсы», - адзначыў Януковіч.

Прэзідэнт Украіны, у прыватнасці, нагадаў аб агульнай бядзе Ўкраіны і Беларусі, звязанай з чарнобыльскай катастрофай.

«Нядаўна я быў у чарнобыльскай зоне, разгледзеў план ліквідацыі наступстваў катастрофы. Не ўсё так добра», - сказаў Януковіч.

Па яго словах, «на саміце ў Вашынгтоне нядаўна мы гаварылі пра ядзерную бяспеку, пра новыя выклікі». «Але ёсць старая праблема, вялізная праблема», - сказаў В. Януковіч, удакладніўшы, што, у прыватнасці, гаворка ідзе пра будаўніцтва саркафагу на Чарнобыльскай АЭС. «Фінансавання не хапае, неабходна прыблізна 400 млн еўра», - адзначыў кіраўнік украінскай дзяржавы. Таму, паведаміў В. Януковіч, ім ініцыявана правядзенне ў наступным годзе канферэнцыі ў Кіеве, у якой прымуць удзел краіны-донары. Таму, дадаў ён, Украіна і Беларусь павінны разам ініцыяваць рашэнне праблем, звязаных з пераадоленнем наступстваў аварыі на Чарнобыльскай АЭС, «сумесна адстойваць пазіцыі». Бо, па словах B. Януковіча, «гэта - пагроза не толькі для Ўкраіны і Беларусі, але і для ўсёй Еўропы».

Прэзідэнт Украіны станоўча адазваўся аб рашэнні «парламента» Беларусі ратыфікаваць дагавор пра дзяржаўныя мяжы паміж краінамі. «Гэта адкрывае для нас новыя магчымасці для супрацоўніцтва», - заявіў В. Януковіч.

Ён падкрэсліў, што «заўсёды наша палітыка будзе добрасуседскай, мы будзем праводзіць празрыстую палітыку».

Прэзідэнт Украіны таксама заявіў пранеабходнасць выхаду на новы ўзровень «у пытаннях правоў чалавека, свабодаў, дэмакратычнага шляху развіцця грамадства». «Нашы краіны ідуць па гэтым шляху. Вельмі важна, каб гэта адчувалі людзі», - сказаў Януковіч.