Андрэй Саннікаў: «Мне было важна заручыцца падтрымкай сям'і Генадзя Карпенкі»
4- 8.04.2010, 12:47
Лідэр «Еўрапейскай Беларусі» наведаў нямецкі горад Эслінген на запрашэнне гарадскіх уладаў.
Адбыліся сустрэчы Андрэя Саннікава з бурмістрам горада Маркусам Рабам, чальцамі гарадскога савета, прадстаўнікамі грамадскіх арганізацыяў, рэлігійных супольнасцяў, праваабаронцамі і журналістамі.
Паездка была арганізаваная па ініцыятыве Людмілы Карпенкі - жонкі памерлага ў Беларусі пры нявысветленых абставінах віцэ-спікера Вярхоўнага Савета 13 склікання Генадзя Карпенкі.
«Для мяне вельмі важная была гэтая паездка, таму што з усіх беларускіх палітыкаў менавіта з Генадзем Карпенкам я працаваў у самым цесным кантакце. Шмат чаму ў яго навучыўся. Сустрэча з Людмілай Філіпаўнай, якая ў цяперашні час жыве ў Эслінгене, эмацыйна вельмі шмат значыла для мяне. Мне было важна заручыцца падтрымкай сям'і Карпенкі перад прэзідэнцкімі выбарамі, што маюць адбыцца.
Эслінген - горад-пабрацім Маладэчна, мэрам якога быў Карпенка, а віцэ-мэрам - Віктар Ганчар. Жыхары горада і гарадскія ўлады вельмі шмат зрабілі для Маладэчна. На жаль, у апошні час беларускі рэжым сур'ёзна перашкаджае развіццю гэтых сувязяў. Бурмістра горада Эслінген нават не пусцілі ў Маладэчна, калі ён прыязджаў на 10-годдзе з дня смерці Генадзя Карпенкі. Тым не менш, жыхары гэтага нямецкага гарадка захоўваюць самае сяброўскае стаўленне да беларусаў і спадзяюцца на хуткае змяненне сітуацыі ў нашай краіне і на перамогу дэмакратыі. Пра гэта ў асноўным былі ўсе нашыя размовы з уладамі і грамадскасцю горада», - паведаміў Андрэй Саннікаў.
Фота з газеты «Эслінген Цайтунг». Людміла Карпенка, бурмістр Маркус Раб і Андрэй Саннікаў
З бурмістрам Эслінгена і сям'ёй Карпенкі
