Літва паставіла «крыж» на беларускай АЭС
12- 7.05.2010, 11:29
Літва афіцыйна не ўхваляе будаўніцтва атамнай электрастанцыі ў Беларусі, якую плануюць пабудаваць у 55 км ад Вільні.
Пра гэта сказана ў афіцыйнай пазіцыі, падрыхтаванай Міністэрствам аховы навакольнага асяроддзя краіны, паведамляе АФН са спасылкай на ru.DELFI.lt.
Як пазначана ў дакуменце, які будзе перададзены беларускаму боку, «ацэнка ўздзеяння будучай АЭС на навакольнае асяроддзе недастаткова вычарпальная, таму літоўскі бок просіць правесці яе паўторную прэзентацыю ў Літве».
«Прааналізаваўшы ацэнку ўздзеяння на навакольнае асяроддзе, мы не ўхваляем будаўніцтва АЭС на Астравецкай пляцоўцы па матывах, выкладзеных у каментарах. Ацэнка недастаткова вычарпальная – у справаздачы абмежаваліся аналізам адзінай пляцоўкі. Гэта не адпавядае вызначэнням канвенцыі Espo, якія патрабуюць падаць альтэрнатыву», – сказана ў дакуменце.
У дакуменце выкладзеная крытыка пляцоўкі, няпоўнай справаздачы, недастаткова падрабязнага апісання рэактара, незразумелага парадку ўтылізацыі радыёактыўных адыходаў і г.д.
У высновах сказана, што ў адпаведнасці з канвенцыяй Espo павінны быць пададзеныя і вычарпальныя дадзеныя па альтэрнатыўных пляцоўках.
У дакуменце пазначана, што, акрамя адсутнасці альтэрнатывы, няма матываў, па якіх была абраная менавіта згаданая Астравецкая пляцоўка, недастаткова матываваны і выбар рэактара.
«Пазначана, што вартасць рэактара тым, што асноўнае абсталяванне і ахоўныя сістэмы выпрабаваныя на двух кітайскіх рэактарах і што ёсць магчымасць вярнуць адпрацаваныя ядзерныя адыходы для доўгатэрміновага захоўвання ў Расею. Незразумелыя іншыя аргументы», – сказана ў адказе.
Акрамя таго, літоўскі бок зазначае, што ў дакументах сказана, што Беларуская АЭС вытрымае толькі падзенне лёгкага самалёта.
«Гэта значыць, што яна не будзе абароненая ад магчымага падзення грамадзянскага авіялайнера. У свеце ўсё больш краінаў з улікам магчымых тэрактаў прымае патрабаванне, каб новыя АЭС маглі вытрымаць падзенне вялікіх грамадзянскіх авіялайнераў. Такіх патрабаванняў будзе прытрымвацца і Літва. Літва лічыць непрымальнай усталяванне рэактара, які не адпавядае пазначанаму патрабаванню», – сцвярджае Міністэрства аховы навакольнага асяроддзя.
«З пададзенай інфармацыі пра неабходную для ахаладжэння колькасць вады мы не можам ацаніць надзейнасць дадзеных і абгрунтаванасць высноваў, што не будзе адмоўнага ўздзеяння на раку Нярыс, не пагоршацца якасныя і колькасныя паказчыкі яе водаў», – сказана ў дакуменце.
Акрамя таго, нагадваюць і пра высновы Літоўскага інстытута фізікі, паводле якіх, у выпадку катастрофы прыйдзецца эвакуяваць Вільню.
Нагадаем, грамадскія слуханні па ацэнцы ўздзеяння на навакольнае асяроддзе будучай беларускай АЭС адбыліся ў Вільні 2 сакавіка бягучага года.
