«Тутэйшых» ў Купалаўскім вырашылі больш не паказваць

«Тутэйшыя» знятыя з нашага рэпертуару, - сказаў загадчык літаратурнай часткі Нацыянальнага акадэмічнага тэатра імя Янкі Купалы Ігар Скрыпка.

«Зусім і назаўсёды. Па-першае, «сдохлі» дэкарацыі. Па-другое, састарэлі артысты. І па-трэцяе, састарэў сам спектакль. Наколькі я ведаю, Мікалай Пінігін вяртацца да гэтага спектакля не будзе. Восенню мінулага года міністр культуры Павел Латушка цікавіўся у Пінігіна, ці плануецца аднаўленне «Тутэйшых». Пінігін сказаў, што не. Бо кожны спектакль мае свой узрост, - сказаў Скрыпка у інтэрв'ю газеце «Народная воля». - Віктару Манаеву, які граў Мікіту Зносака, у жніўні гэтага года будзе 52 гады. А яго герою ў п'есе Янкі Купалы - 25-28. У нашым тэатры, вядома, ёсць таленавітая моладзь, але ... Вы ўяўляеце, што такое аднавіць гэты спектакль, увесці абсалютна новых артыстаў? Гэта фактычна зрабіць новую пастаноўку ... »

Мікалай Пінігін кажа, што калі да яго звернецца хто-небудзь з маладых рэжысёраў з просьбай паставіць «Тутэйшых» на Купалаўскай сцэне, то ён разгледзіць яго прапанову.

«Мне нават намеснік міністра культуры Уладзімір Рылатка прапаноўваў аднавіць «Тутэйшых», - распавядае Мікалай Мікалаевіч. - Паверце, зараз няма ніякіх праблем з гэтым спектаклем.

Але я як мастак ужо не хачу да яго вяртацца. Гэты спектакль зрабіў сваю справу.

Няхай які-небудзь малады рэжысёр прыйдзе і зробіць сваю версію «Тутэйшых». Я не супраць. Але я не ўяўляю, што гэта будзе за спэктакль без Віктара Манаева. Мне здаецца, што ў тэатры няма другога такога артыста, які мог бы гэта сыграць. Я зараз «Пінскую шляхту» буду рабіць у Варшаве. І мне галоўны рэжысёр тэатра казаў: маўляў, я табе знайду артыста лепш Манаева. Пашукаў год і не знайшоў. І сказаў: хачу Манаева. І мы зараз паедзем у Варшаву са сваім спектаклем ...»

***

Спектакль «Тутэйшыя» па аднайменным творы Янкі Купалы ў 1990 годзе паставіў вядомы рэжысёр Мікалай Пінігін. У 1992 годзе «Тутэйшыя» атрымалі Дзяржаўную прэмію Беларусі.

У спектаклі былі занятыя лепшыя акцёры Купалаўскага тэатра - Віктар Манаеў, Зоя Белахвосцік, Марыя Захарэвіч, Генадзь Аўсянікаў, Аляксандр Лабуш, Аляксандр Падабед і іншыя.

У фінале «Тутэйшых» лунаў бел-чырвона-белы сцяг. Некаторыя гледачы падчас гэтай сцэны выкрыквалі «Жыве Беларусь!». Па гэтай прычыне каля дзесяці гадоў таму кіраўнікі ад культуры спрабавалі ўсімі праўдамі і няпраўдамі зняць «палітычны» спектакль з рэпертуару. На паўтара года спектакль быў фактычна забаронены. Прыблізна ў 2002 годзе Мікалай Пінігін аднавіў «Тутэйшых». А потым спектакль зноў знік з рэпертуару ...