Ежы Бузэк назваў палітыку Лукашэнкі «фарсам»
7- 10.06.2010, 13:14
Прэзідэнт Еўрапарламента Ежы Бузэк сустрэўся са студэнцкай дэлегацыяй Еўрапейскага гуманітарнага ўніверсітэта.
«Гэтыя студэнты, як і шмат якія іншыя студэнты ў Беларусі, вартыя пахвалы за адмову прымаць на веру прыгожа ўпакаваную праўду, якая на справе з'яўляецца не больш чым фарсам дэмакратыі», — заявіў Ежы Бузэк.
«Дзейнасць універсітэта — гэта форма інтэлектуальнага супрацьстаяння, якую неабходна падтрымліваць, аказваць ёй садзейнічанне. Свабодная Беларусь заўтрашняга дня мае патрэбу ў новых элітах, здольных кіраваць дэмакратычна і кампетэнтна, а Еўрапейскі гуманітарны ўніверсітэт з'яўляецца спрыяльнай глебай для іх падрыхтоўкі», — лічыць прэзідэнт Еўрапарламента.
Як перадае БелаПАН, Ежы Бузэк таксама звярнуўся да беларускіх уладаў з патрабаваннем распачаць канкрэтныя крокі па ўмацаванні адкрытага дэмакратычнага грамадства, заснаванага на законнасці і выкананні правоў чалавека. Ён са шкадаваннем прызнаў, што ў апошні час не адбываецца ніякіх пасоўванняў у гэтым накірунку: «Калі сітуацыя не зменіцца, дык Еўрапейскі гуманітарны ўніверсітэт і афіцыйны Менск, на жаль, па-ранейшаму застануцца вельмі аддаленымі адзін ад аднаго».
У праграме паездкі студэнтаў ЕГУ ў Брусэль, апрача візіту да Е.Бузэка — сустрэчы з дэпутатамі з дэлегацыі Еўрапейскага парламента па сувязях з Беларуссю і падкамітэта па правах чалавека.
