БАЖ звяртаецца да кіраўніка МУС і генпракурора
1- 7.09.2010, 9:22
Звароты на імя Анатоля Куляшова і Рыгора Васілевіча Беларуская асацыяцыя журналістаў накіравала 6 верасня.
Арганізацыя заклікае ўлады зрабіць усё магчымае для правядзення ўсебаковага, непрадузятага і празрыстага расследавання абставінаў гібелі заснавальніка і кіраўніка сайта charter97.org Алега Бябеніна.
Прыводзім іх тэкст цалкам:
«Паважаны Анатоль Нілавіч (Рыгор Аляксеевіч)!
Сябры ГА «Беларуская асацыяцыя журналістаў» выказваюць крайнюю занепакоенасць абставінамі смерці свайго калегі, сябра арганізацыі Алега Бябеніна, якога 3 верасня знайшлі павешаным на яго лецішчы.
Следства ў першую чаргу разглядае версію самагубства, таму што судова-медыцынская экспертыза не выявіла ніякіх іншых пашкоджанняў, акрамя странгуляцыйнай разоры на шыі журналіста.
Аднак блізкія, сябры і калегі Алега сцвярджаюць, што яго паводзіны, планы і жыццёвыя абставіны ніяк не прадвесцілі намеры добраахвотна пайсці з жыцця.
Гібель вядомага журналіста і грамадскага актывіста ўжо апынулася ў цэнтры ўвагі беларускай і міжнароднай грамадскасці.
Асаблівую занепакоенасць выклікае тое, што ні па адной са знакавых справаў, звязаных з гібеллю або знікненнем беларускіх журналістаў, следства не дало адказаў на пытанне - хто ж вінаваты ў іх смерці.
Таму ГА «БАЖ» заклікае Вас зрабіць усё магчымае для правядзення ўсебаковага, непрадузятага і празрыстага расследавання абставінаў гібелі Алега Бябеніна».
