Кіраўнік Калмыкіі не хоча ісці на пяты тэрмін

Кірсан Ілюмжынаў заявіў, што ў бліжэйшы час пакіне свой пост.

«24 кастрычніка мінае мой чацвёрты тэрмін знаходжання на пасадзе прэзідэнта Калмыкіі, і я не лічу магчымым ісці на пяты тэрмін», - заявіў палітык у панядзелак, 6 верасня, у тэлефонным інтэрв'ю «Інтэрфаксу», перадае Lenta.ru.

Ён таксама паведаміў, што падтрымае ў якасці свайго пераемніка любога чалавека, прапанаванага «Адзінай Расеяй», сябрам якой ён сам з'яўляецца.

Гаворачы пра прычыны, у сувязі з якімі ён не хоча больш змагацца за пасаду кіраўніка Калмыкіі, Ілюмжынаў заявіў, што падтрымлівае «палітыку прэзідэнта Расеі, накіраваную на абнаўленне кіраўнікоў рэгіёнаў».

Між тым, 6 верасня прайшлі першыя кансультацыі па пытанні вылучэння кандыдатаў на пасаду кіраўніка Калмыкіі. Як паведамляецца на сайце «Адзінай Расеі», у ёй прынялі ўдзел прадстаўнікі партыі і першы намеснік кіраўніка адміністрацыі прэзідэнта РФ Уладзіслаў Суркоў.

У паведамленні «АР» не называюцца прозвішчы магчымых кандыдатаў.

Перад пачаткам кансультацый кіраўнік выканкама «Адзінай Расеі» Андрэй Вараб'ёў распавёў газеце «Коммерсант», што яны працягнуцца да 8 верасня.