Выбухной хваляй накрыла Інтэрнэт

Падобна да таго, што Інтэрнэт чакае грунтоўная зачыстка. У межах барацьбы з тэрарызмам ўлады рыхтуюць глебу для навядзення парадку ў Сеціве.

Вось толькі падставы для гэтага моцна «кульгаюць». Давайце прааналізуем апошнія заявы высокапастаўленых чыноўнікаў.

- На вялікі жаль у шэрагу СМІ і Інтэрнэце былі танцы на крыві з боку асобных аўтараў, - заявіў Генпракурор Рыгор Васілевіч, адзначыўшы пры гэтым, што шэраг каментароў з нагоды выбуху насілі здзеклівы характар. - Частка аўтараў будзе выкліканая на допыты па расследуемай крымінальнай справе. Што тычыцца інтэрнэт-парталаў, то тут трэба наводзіць парадак.

Сапраўды, з пункту гледжання маралі здзеклівыя каментары пра падзеі, якія прынеслі столькі гора і слёз, выглядаюць досыць цынічна. І цалкам могуць выклікаць у грамадстве буру абурэння. Вось толькі ці былі такія?

Праглядаючы па службе па некалькі дзясяткаў сайтаў у дзень, за ўвесь час з моманту выбуху мне ні разу не атрымалася наткнуцца хоць бы на адну публікацыю «здзеклівага характару». Было ўсё: боль, гора, спроба разабрацца ў тым, што здарылася, але ні адной, нават малой, насмешкі з нагоды таго, што адбылося ці проста з'едліва каментара.

Аднак улады грунтоўна падышлі да падрыхтоўкі грамадскай думкі. Для тых, каму версія з публікацыямі падасца малапераканаўчай, ёсць яшчэ адна - антытэрарыстычная. Як паведамляе interfax.by, на пытанне журналістаў, дзе злачынцы ўзялі выбухоўку, старшыня КДБ Вадзім Зайцаў адназначна заявіў: «У Інтэрнэце».

Вось вам самая што ні на ёсць добрапрыстойная падстава разабрацца з Сусветным павуціннем.

Але ёсць адно «але». Па інфармацыі «БЕЛТА», той жа Зайцаў паведаміў, што для тэракту ў менскім метро была выкарыстаная выбухоўка, якая не мае аналагаў у свеце...

Нестыковачка атрымліваецца: нідзе ў свеце такой выбухоўкі няма, а злачынцы спакойна атрымліваюць яе дзякуючы Інтэрнэту. Дзіўнае побач.

З моманту тэракту ў метро прайшло тры дні, а выбухная хваля ўсё яшчэ працягвае распаўсюджвацца. На чарзе - Інтэрнэт.

Павел Дзмітрыеў, «Салiдарнасць»