Ірына Халіп ўспрыняла навіну аб змякчэнні абвінавачвання спакойна

Можна выказаць здагадку, што рашэнне аб змякчэнні артыкула было прынятае загадзя.

Ірыне Халіп, каардынатару кампаніі «Еўрапейская Беларусь» Зміцеру Бандарэнку, сустаршыні партыі «Беларуская хрысціянская дэмакратыя» Паўлу Севярынцу і начальніку штаба кандыдата ў прэзідэнты Мікалая Статкевіча Сяргею Марцалеву прад'яўленае новае абвінавачванне, ужо не па 293-м артыкуле аб масавых беспарадках, а па частцы 1 артыкула 342: «Арганізацыя і падрыхтоўка дзеянняў, якія груба парушаюць грамадзкі парадак, альбо актыўны ўдзел у іх». У адрозненне ад 293., якая прадугледжвае да 15 гадоў пазбаўлення волі, 342-і артыкул прадугледжвае штраф, арышт на тэрмін да шасці месяцаў або абмежаваннем волі на тэрмін да трох год.

Як распавяла маці Ірыны Люцына Юр'еўна, Іра ўспрыняла навіну спакойна. Можна выказаць здагадку, што рашэнне аб змякчэнні артыкула было прынятае загадзя: яшчэ ў пятніцу Ірыне абвясцілі, што ў панядзелак адвязуць да следчага, хоць прычыны гэтага не тлумачылі, паведамляе «Новая газета».

30 красавіка такое ж абвінавачанне было прад'яўленае кандыдатам у прэзідэнты Уладзіміру Някляеву, Віталю Рымашэўскаму, журналісту Аляксандру Фядуту, паплечніку Някляева Сяргею Вазняку, кіраўніку выбарчага штабу Някляева Андрэю Дзмітрыеву і актывістцы руху «Малады фронт» Анастасіі Палажанка.

На меру стрымання абвінавачаных змена артыкула не паўплывала. Ірына застаецца пад хатнім арыштам, Павел Севярынец, Сяргей Марцалеў і Зміцер Бандарэнка - у СІЗА КДБ (Зміцер цяжка хворы, у яго пашкоджаны хрыбетнік, амаль не рухаецца нага і ўзніклі праблемы з унутранымі органамі). На днях яны павінныя атрымаць для азнаямлення свае крымінальныя справы.

Абвінавачванне мужа Ірыны, кандыдата ў прэзідэнты Андрэя Саннікава, а таксама Мікалая Статкевіча і Зміцера Уса засталіся без змены. Больш за тое: правілы ўтрымання ў СІЗА КДБ (Саннікаў і Статкевіч таксама знаходзяцца там) зрабілі больш жорсткімі: зараз перадачы зняволеным можна перадаваць не тры разы на тыдзень, а два разы на месяц.

Прычыны змякчэння абвінавачвання агучыла само беларускае МУС. У паведамленні ягонай прэс-службы гаворыцца, што «безгрунтоўныя сцвярджэнні аб прызнанні выбараў Прэзідэнта Рэспублікі Беларусь несапраўднымі, якія прагучалі ў іхніх публічных заявах, сталі штучна створанай падставай для рэакцыі дзяржаў Еўрапейскага Звязу і ЗША, якія распачалі меры па ўвядзенні са свайго боку санкцый як спосаба эканамічнага і палітычнага ціску на афіцыйную ўладу ў Беларусі».

Падобна да таго, што пачалася звычайная для Беларусі гульня, у якой улады краіны спрабуюць наладзіць адносіны з Захадам і змякчыць уведзеныя ім санкцыі, абяцаючы аблегчыць лёс палітвязнямі. «Мы чакалі, што будзе гандаль. Ну, вось ён і пачаўся», - згодная Люцына Юр'еўна.

Разумеючы гэта, амбасада ЗША ў Менску ўжо заявіла, што пазіцыя Злучаных штатаў застаецца нязменнай: «Мы працягваем заклікаць да неадкладнага вызвалення ўсіх затрыманых і асуджаных і зняцця з іх усіх абвінавачванняў».