Кошт БелАЭС пакуль не вызначаны

Беларусь і Расея зблізілі пазіцыі ў пытаннях падрыхтоўкі кантрактнага і крэдытнага пагадненняў на будаўніцтва беларускай АЭС.

Пра гэта паведаміў карэспандэнту БелТА першы намеснік міністра энергетыкі Беларусі Эдуард Таўпянец.

Ход і ўмовы падрыхтоўкі пакета дакументаў па АЭС абмяркоўваліся на экспертным узроўні 15 жніўня ў межах пасяджэння Савета Міністраў «Саюзнай дзяржавы».

Бакі дамовіліся падпісаць кантрактнае пагадненне, не чакаючы вынікаў экспертызы дакументацыі зводнага каштарыснага разліку па будаўніцтву АЭС. Пры фарміраванні коштаў, якія будуць закладвацца ў гэтае пагадненне, за арыенцір возьмуць Балтыйскую АЭС у Калінінградскай вобласці, якая выступае прататыпам беларускай. «Канчатковы для нас кошт будзе ўсталяваны пасля таго, як пройдзе экспертызу Балтыйская АЭС і потым будзе распрацаваны тэхпраект для Беларусі», - дадаў суразмоўца.

На думку Эдуарда Таўпянца, падпісанне кантрактнага пагаднення на такіх умовах для Беларусі цалкам прымальнае. «Для паскарэння працэсу можна пайсці на гэты варыянт - прапісаць кошты арыентыровачна, а потым іх папраўляць з улікам распрацоўкі тэхпраекта. Трэба будзе, вядома, усё яшчэ раз дэталёва ацаніць і прааналізаваць, аднак у цэлым я лічу, што нам на гэта можна пайсці, - сказаў ён. - Трэба толькі гэтае пытанне прапрацаваць і прыняць калегіяльнае рашэнне».

Адказваючы на ​​пытанне, ці будзе кантрактнае пагадненне падпісанае ўвосень, першы намеснік міністра даў станоўчы адказ. «Безумоўна, дакументы будуць падпісаныя», - сказаў ён. Паралельна вядзецца падрыхтоўка генеральнага кантракта на будаўніцтва АЭС. Гэты працэс таксама ўвязаны з вынікамі экспертызы тэхпраекта будаўніцтва аб'екта і кантрактным пагадненнем.

Эдуард Таўпянец дадаў, што бакі зблізілі пазіцыі і па крэдытнай дамове на будаўніцтва АЭС. «Прыблізна мы вызначыліся, але перамовы працягваюцца», - адзначыў ён. Першы намеснік міністра таксама выказаў упэўненасць у тым, што паскарэнне падрыхтоўкі і падпісання неабходных для будаўніцтва АЭС дакументаў нададуць новы імпульс праекту, і Беларусь, як і запланавана, зможа ўвесці ў строй першы энергаблок атамнай станцыі ў 2017 годзе.

Як паведамлялася, Беларусь вызначыла з расейскім бокам прынцыпы крэдытавання будаўніцтва АЭС - не толькі ядзернай выспы, а ў цэлым аб'екта, уключна з інжынернай інфраструктурай. Пры гэтым Беларусь не будзе прэтэндаваць на атрыманне расейскага крэдыту на стварэнне сацыяльнай інфраструктуры для будучай АЭС.

Атамная электрастанцыя ў Беларусі будзе будавацца па расейскім праекце АЭС-2006, распрацаваным ААТ «Санкт-Пецярбургскі навукова-даследчы і праектна-канструктарскі інстытут «Атамэнергапраект» (уваходзіць у расейскую дзяржкарпарацыю «Расатам»). Распрацоўку катлавана для будаўніцтва беларускай АЭС на Астравецкай пляцоўцы ў Гродзенскай вобласці плануецца пачаць ужо ў верасні гэтага года. Зараз там вядуцца падрыхтоўчыя працы, ідзе будаўніцтва аўтамабільнай дарогі і чыгункі, ствараецца вытворчая база. Чакаецца, што першы энергаблок АЭС будзе запушчаны ў 2017 годзе, другі плануецца запусціць у 2018 годзе.