Лукашэнкаўская дыктатура пачала ядзерны шантаж ЗША

У адказ на санкцыі ЗША Беларусь замарожвае сумесныя праекты па абмене высокаўзбагачанага ядзернага паліва.

«Увядзенне новых амерыканскіх эканамічных санкцый ідзе насуперак духу ўзаемадзеяння і супрацоўніцтва. У гэтых умовах беларускім бокам прынятае рашэнне аб замарожванні сумесных з ЗША праектаў па абмене высокаўзбагачанага ядзернага паліва ў межах ініцыятывы па зніжэнні глабальнай пагрозы міністэрства энергетыкі ЗША, а таксама па стварэнні праграмы МБА пры Беларускім дзяржаўным універсітэце», - заявіў агенцтву «Інтэрфакс-Захад» начальнік упраўлення інфармацыі - прэс-сакратар МЗС Андрэй Савіных.

«Беларусь па-ранейшаму будзе забяспечваць фізічную бяспеку ядзернага паліва, у поўнай адпаведнасці з міжнароднымі абавязацельствамі ў галіне нераспаўсюджвання. Мы таксама не выключаем прыняцця іншых мераў у адказ», - дадаў прэс-сакратар.

«Спыненне Злучанымі Штатамі прымянення мер эканамічнага прымусу ў дачыненні да Беларусі і аднаўленне нармальнага клімату ва ўзаемаадносінах дадуць магчымасць аднаўлення супрацоўніцтва па гэтых праектах», - сказаў А. Савіных.

Ён адзначыў, што рэспубліка лічыць «рашэнне ўрада ЗША аб увядзенні эканамічных абмежавальных мер у дачыненні да Беларусі неабгрунтаваным і неправамерным крокам». «Гэта - палітычна матываваныя рашэнні, якія супярэчаць міжнародным абавязацельствам ЗША», - падкрэсліў ён.

Савіных звярнуў увагу, што дзеянні ЗША з'яўляюцца грубым парушэннем Будапешцкага Мемарандума 1994 года, згодна з якім Злучаныя Штаты абавязаліся не ўжываць у дачыненні да Беларусі меры эканамічнага прымусу.

«ЗША парушылі і палажэнні Хельсінкскага заключнага акта, які ўскладае на ўсе дзяржавы абавязальніцтва «пры ўсіх акалічнасцях устрымлівацца ад любога акту эканамічнага прымусу, накіраванага на падначаленне сваім уласным інтарэсам ажыццяўлення іншай дзяржавай-удзельніцай правоў, уласцівых яе суверэнітэту», - сказаў прэс-сакратар МЗС .

Прадстаўнік МЗС Беларусі дадаў таксама, што дзеянні ЗША супярэчаць і рэзалюцыі Генасамблеі ААН 62/183, згодна з якой «ні адна дзяржава не можа ні прымяняць, ні заахвочваць прымяненне аднабаковых эканамічных, палітычных мер або мер любога іншага характару з мэтай дабіцца падпарадкавання сабе іншай дзяржавы ў ажыццяўленні ёю сваіх суверэнных правоў».

З-за брутальнага парушэння ў Беларусі правоў чалавека Міністэрства фінансаў ЗША зацвердзіла шэраг эканамічных санкцый у дачыненні да найбуйнейшых беларускіх прадпрыемстваў «Нафтан», «Белшына», «Гродна-Азот», «Гродна-Хімвалакно». Да гэтага моманту эканамічныя санкцыі ЗША дзейнічалі ў дачыненні да 5-ці беларускіх кампаній: ААТ «Лакафарба», ААТ «Полацк Шкловалакно», Белтэхэкспарт, БелОМА, Беларуснафта.

Дадзеныя эканамічныя санкцыі забараняюць грамадзянам ЗША любыя камерцыйныя ўгоды з гэтымі прадпрыемствамі, а любыя актывы, што падпадаюць пад санкцыі акцыянерных таварыстваў у ЗША, калі такія маюцца, будуць замарожаныя.