Андрэй Саннікаў: Толькі змена ўлады

Кандыдат у прэзідэнты не мае намеру мяняць свой турэмны тэрмін на легітымнасць дыктатара.

Андрэй Саннікаў, прысуджаны да 5 гадоў турмы за арганізацыю акцыі пратэсту супраць фальсіфікацыі вынікаў прэзідэнцкіх выбараў, перадаў на волю адкрыты зварот:

«Толькі змена ўлады ў Беларусі можа вывесці краіну з крызісу. Больш за тое, толькі змена ўлады зможа захаваць Беларусь як незалежную дзяржаву, выратаваць нашую мову і культуру. Сёння для гэтага ў нас ёсць унікальны і, самае галоўнае, рэальны шанец.

Пасля 19 снежня 2010 года усяму свету стала зразумела, што рэжым Лукашэнкі небяспечны для беларусаў, што беларускі народ не падтрымлівае цяперашнюю ўладу, але пазбаўлены права выбару з-за таго, што ягоны голас ігнаруюць. Усім відавочна, што эканамічны крах у Беларусі - гэта вынік палітыкі цяперашняга рэжыму. Больш за тое, далейшае знаходжанне Лукашэнкі ва ўладзе прывядзе да поўнага калапсу эканомікі.

Мы можам і павінныя сёння змяніць свой лёс і аднавіць добрае імя Беларусі ў адносінах з нашымі суседзямі, Расеяй і Еўропай, а таксама са Злучанымі Штатамі Амерыкі. Усе чакаюць, што мы, нарэшце, самі гэта зробім. Менавіта гэтае пытанне павіннае сёння стаць галоўным для беларусаў. Час для дыялогу з уладай застаўся ў мінулым. Апошняя спроба такога дыялогу скончылася 19 снежня збіццём тысяч людзей і арыштамі соцен. Калі рэжым кажа аб дыялогу, ён мае на ўвазе ўтрыманне ўлады любым коштам і знішчэнне апазіцыі. Трэба памятаць сваю гісторыю і здабываць з яе ўрокі.

Сёння шматлікія ўзгадваюць дыялог з уладай у 1999 годзе, але пазбягаюць прынцыповай ацэнкі гэтага дыялогу. Я лічу, што гэта былі самыя ганебныя старонкі ў гісторыі беларускай апазіцыі, таму што сфарміраваная офісам АБСЕ і рэжымам Лукашэнкі перамоўная група вяла дыялог, закрываючы вочы на ​​смерці і знікненні палітычных лідэраў. У красавіку 1999 года пры нявысветленых абставінах памёр Генадзь Карпенка. У маі - знік Юрый Захаранка. У верасні - выкрадзеныя Віктар Ганчар і Анатоль Красоўскі. Але «перамоўшчыкі» нават не ўзгадвалі пра іх.

Адно гэта ўжо пазбаўляе той жа рэжым права казаць аб дыялогу, а апазіцыю - нават разглядаць такую ​​магчымасць. Вынік таго дыялогу - яшчэ 12 гадоў гідкай дыктатуры. Апазіцыя не можа дазволіць ўладам у чарговы раз выкарыстаць сябе як аднаразовы выраб. Не гэтага чакае народ Беларусі. Не гэтага чакаюць нашы суседзі і ў Расеі, і на Захадзе, а таго, што Беларусь стане нармальным прадказальным міжнародным партнёрам.

Я ведаю, што мая пазіцыя, мае заявы падаўжаюць тэрмін майго знаходжання ў няволі, але гэта і з'яўляецца сведчаннем сапраўдных намераў рэжыму. Усе перадумовы для змены ўлады, для вяртання народу права выбару сёння існуюць. Патрэбныя рашучасць, мужнасць, прынцыповасць.

Гісторыя робіцца сёння. Гісторыю робім мы. Разам мы пераможам!»