19 траўня 2024, Нядзеля, 1:49
Падтрымайце
сайт
Сім сім,
Хартыя 97!
Рубрыкі

Бардзюжа: АДКБ не будзе падаўляць апазіцыйныя сілы

98
Бардзюжа: АДКБ не будзе падаўляць апазіцыйныя сілы

Арганізацыя Дамовы аб калектыўнай бяспекі «не будзе падаўляць апазіцыйныя сілы ў тых альбо іншых дзяржавах».

Аб гэтым заявіў журналістам 9 верасня ў Маскве генеральны сакратар АДКБ Мікалай Бардзюжа, папярэдзіўшы асцярогі некаторых СМІ, што сілы арганізацыі могуць быць выкарыстаныя для барацьбы з апазіцыяй.

Бардзюжа падкрэсліў, што АДКБ не будзе выкарыстоўваць Калектыўныя сілы аператыўнага рэагавання (КСАР) для абароны канстытуцыйнага ладу дзяржаваў-сябраў арганізацыі, у гэтым выпадку могуць выкарыстоўвацца міратворчыя сілы. Па ягоных словах, пры звароце ў Савет калектыўнай бяспекі АДКБ законнага кіраўніка краіны, у якой адбываецца спроба звяржэння дзейнай улады, СКБ можа прыняць рашэнне «адправіць у гэту дзяржаву міратворчыя сілы, але не КСАР». «Задача міратворцаў АДКБ толькі раз'яднаць супрацьлеглыя бакі», - цытуе Бардзюжу РІА «Новости».

Нагадаем, 30 жніўня прэзідэнт Беларусі Аляксандр Лукашэнка на сустрэчы ў Менску з Мікалаем Бардзюжам заявіў, што краіны АДКБ абмяркоўваюць пытанні ўжывання КСАР для прадухілення дзяржаўных пераваротаў. На сустрэчы, фрагменты якой былі паказаныя беларускімі тэлеканаламі, Лукашэнка заявіў, што ідзе гаворка «аб прымяненні сілаў, не толькі звязаных з умяшаннем звонку і агрэсіяй, але і аб умяшанні іншых дзяржаваў знутры краін АДКБ». «Мы сур'ёзна абмяркоўвалі гэту праблему. Гэта значная падтрымка краін, якія будуць уваходзіць у АДКБ. Фронтам, вайной ніхто на нас сёння не пойдзе, а вось канстытуцыйны пераварот зладзіць рукі свярбяць у шматлікіх. Вядома, мы павінныя абараняць цэласнасць і незалежнасць краін АДКБ», - падкрэсліў Лукашэнка, перадае БелаПАН.

Такая пазіцыя была раскрытыкаваная ў Расеі. У прыватнасці, газеце «Известия» крыніца ў Крамлі заявіла, што Аляксандр Лукашэнка «выкарыстоўваў у сваіх мэтах і вульгарызаваў» ідэю дапамогі з боку АДКБ.

Аднак 7 верасня памочнік прэзідэнта РФ Сяргей Прыходзька заявіў журналістам: Расея і Беларусь адзіныя ў меркаванні аб магчымасці выкарыстання патэнцыялу АДКБ для прадухілення спробаў звяржэння канстытуцыйнай улады ў краінах-удзельніцах арганізацыі. «Разважанні з крытыкай Аляксандра Рыгоравіча па выніках ягоных ацэнак дзейнасці АДКБ не адпавядаюць рэчаіснасці. Ён выступаў у гэтай частцы з пазіцый, якія ўзгоднены з расійскім бокам. У нас ёсць, як і ў іх, напэўна некаторыя крытычныя ацэнкі [на адрас адзін аднаго], але сумесная дзейнасць у АДКБ - не той выпадак», — сказаў Прыходзька.

9 верасня ў гутарцы з журналістамі Бардзюжа не выключыў, што АДКБ могуць быць нададзеныя пасярэдніцкія функцыі для ўрэгулявання праблемаў паміж дзвюма ці некалькімі дзяржавамі-ўдзельніцамі. Па ягоных словах, у межах АДКБ ужо ёсць магчымасць прызначэння спецпрадстаўніка-пасярэдніка па крызісным рэагаванні на надзвычайныя сітуацыі. Такі ж прадстаўнік можа з'явіцца і пры неабходнасці ўрэгулявання двухбаковых адносінаў, лічыць Бардзюжа.

«Савет калектыўнай бяспекі ў выпадку з'яўлення сур'ёзных двухбаковых праблемаў паміж дзяржавамі-ўдзельніцамі арганізацыі мог бы прызначаць спецыяльнага прадстаўніка, які аб'ектыўна, а не суб'ектыўна можа разабрацца ў сітуацыі і праінфармаваць СКБ, які на падставе гэтага дакладу і можа прыняць рашэнне, якое спрыяе ўрэгуляванню двухбаковага канфлікту», - сказаў генеральны сакратар. Па ягоных словах, малаважныя канфлікты паміж краінамі-ўдзельніцамі ўжо ўрэгуляваліся ў межах арганізацыі, але «явачным парадкам». «Неабходна надаць гэтай функцыі юрыдычнае права», - лічыць Бардзюжа.

Напісаць каментар 98

Таксама сачыце за акаўнтамі Charter97.org у сацыяльных сетках