У Варшаве прэзентавалі кнігу пра «Плошчу-2010»
3- 26.01.2012, 9:20
Удзел у прэзентацыі прынялі былыя палітвязні Наталля Радзіна і Аляксандр Атрошчанкаў.
Мерапрыемства прайшло 25 студзеня ў Беларускім Доме, перадае «Еўрарадыё».
Акрамя кнігі вядомага беларускага журналіста Аляксандра Тамковіча «Супраць плыні», прысвечанай беларусам, асуджаным за ўдзел у «Плошчы-2010», прадставілі таксама кнігу «Без палітыкі». Яна распавядае пра невядомыя захапленнях і хобі беларускіх апазіцыйных палітыкаў.
Мерапрыемства сабрала поўную залу людзей. Як распавёў адзін з кіраўнікоў «Беларускага дома» Зміцер Бародка, гэта паказвае, што лёс асуджаных хвалюе таксама і вялікую колькасць палякаў.
«Тэма кнігі «Супраць плыні» мне асабіста блізкая таму, што я непасрэдна быў удзельнікам падзеяў 19 снежня 2010 года. Жаль да гэтага часу за кратамі застаюцца людзі асуджаныя за Плошчу. Гэта праблема, якая хвалюе і беларусаў і палякаў. Таму на прэзентацыю прыйшла такая вялікая колькасць людзей. Ад таго наколькі мы сёння дамо правільныя ацэнкі тым падзеям, залежыць у якім кірунку наша грамадства будзе рухацца далей», - распавёў Зміцер Бародка.
Акрамя самога аўтара кніг на прэзентацыі таксама выступілі героі кнігі «Супраць плыні» - Аляксандр Атрошчанкаў і Наталля Радзіна. Яны распавялі аб сваім знаходжанні за кратамі і першых адчуваннях пасля выхаду на волю.