Прадстаўніка Беларусі выгналі з пасяджэння ПАСЕ

У Страсбургу разгарэўся скандал з удзелам прадстаўніка Беларусі.

Прадстаўнік беларускіх улад быў вымушаны пакінуць пасяджэнне палітычнага камітэту Парламенцкай асамблеі Савета Еўропы (ПАСЕ) у Страсбургу, на якім разглядалася беларускае пытанне, так як ён не атрымаў спецыяльнага запрашэння.

Інфармацыя пра скандал ў Страсбургу прагучала 4 кастрычніка на брыфінгу ў Міністэрстве замежных спраў Беларусі, піша БелаПАН.

Карэспандэнт ІТАР-ТАСС папрасіў прэс-сакратара МЗС Андрэя Савіных пракаментаваць рашэнні, прынятыя на пасяджэнні паліткамітэта ПАСЕ ў дачыненні да Беларусі, а таксама скандал з выгнаннем беларускага прадстаўніка з залы пасяджэння.

У адказ Савіных заявіў, што пазіцыя МЗС з гэтай нагоды будзе прадстаўлена пазней.

Спецыяльная рэзалюцыя Парламенцкай асамблеі Савета Еўропы па сітуацыі ў Беларусі будзе падрыхтавана да студзеня 2013 года. Пра гэта 4 кастрычніка заявіў дакладчык Асамблеі, эстонскі дэпутат Андрэс Херкель.

«Праца над дакументам пачнецца ўжо ў лістападзе, - адзначыў Херкель. - Цалкам магчыма, што ў студзені наступнага года даклад будзе гатовы».

Паводле яго слоў, Асамблеі трэба будзе перш за ўсё даць палітычную ацэнку «парламенцкім выбарам» у Беларусі.

«Наш апошні даклад па тэме адносіцца да пачатку 2012 года. Мы шкадуем, што сітуацыя з правамі чалавека і дэмакратыяй за мінулы час толькі пагоршылася ».

«Цяпер у Беларусі 12 палітвязняў, - канстатаваў дакладчык. - Стан здароўя некаторых з іх выклікае асаблівую заклапочанасць».

У адкрытым для прэсы пасяджэнні камітэта ПАСЕ прынялі ўдзел старшыня Беларускага Хельсінкскага камітэта Алег Гулак і намеснік кіраўніка Праваабарончага цэнтра «Вясна» Валянцін Стэфановіч.

Нагадаем, «парламенцкія выбары» ПАСЕ ацаніла як не адпаведныя міжнародным дэмакратычным стандартам. Варта адзначыць, што Беларусь не з’яўляецца ўдзельнікам Парламенцкай асамблеі Савета Еўропы (ПАСЕ).