Лукашэнка патрабуе ўзяць дрэваапрацоўку «штурмам»

Дыктатар запатрабаваў ад новага кіраўніка канцэрна «Беллеспаперапрам» Аляксандра Пераслаўцава «штурмам» завяршыць «мадэрнізацыю» дрэваапрацоўчых прадпрыемстваў.

«Я практычна штурмам прапаную ўзяць гэтую вышыню. І на дрэваапрацоўцы мы навучым і іншых, як трэба працаваць і ставіцца да справы», - заявіў Лукашэнка, прызначаючы ў панядзелак Пераслаўцава старшынёй канцэрна «Беллеспаперапрам», піша «Інтэрфакс».

Лукашэнка адзначыў, што сёння ў галіны існуе шмат праблем. «У нас вельмі шмат праблем у дрэваапрацоўцы. Вы бачылі мае цвёрдыя рашэнні. Я не магу дараваць былому кіраўніцтву гэтае зацягванне з уводам магутнасцяў. Гэта ж і адпаведныя страты», - адзначыў кіраўнік.

Ён дадаў, што прызначэнне Пераслаўцава, які да прызначэння на гэтую пасаду кіраваў холдынгам «Беларускія шпалеры», матывавана тым, што гэтае прадпрыемства «не завалена і не правалена», а з'яўляецца прыбытковым.

Ён нагадаў, што прыняў жорсткія рашэнні ў частцы кадравай палітыкі на прадпрыемствах галіны. «Усе гэтыя мае, скажам так, непапулярныя рашэнні з нагоды звальненняў, замацавання кадраў на гэтых вытворчасцях - гэта не таму, што іх там не хапае.

Проста трэба парадак навесці. Нельга мантачыць грошы», - падкрэсліў дыктатар.

Лукашэнка адзначыў, што ў бліжэйшы час мае намер наведаць дрэваапрацоўчыя прадпрыемствы ў Магілёве і Віцебску, дзе гаворка пойдзе аб рэалізацыі планаў па мадэрнізацыі вытворчасцей.