Паўла Вінаградава будуць судзіць за «памылковую» акцыю

(абноўлена) Суд над Паўлам Вінаградавым, лідэрам «Zмены» прызначаны на 17 снежня. Да суда ён адпушчаны на волю.

Нагадаем, вечарам 11 снежня Вінаградаву, які знаходзіцца пад наглядам міліцыі, патэлефанавалі з крымінальна-выканаўчай інспекцыі Маскоўскага раёна Менска і папрасілі з'явіцца ў сераду раніцай для запаўнення нейкіх папер. Калі сёння моладзевы актывіст прыйшоў у інспекцыю, ён быў затрыманы і дастаўлены ва УУС Першамайскага раёна.

Як распавёў Павел БелаПАН, там на яго яго склалі пратакол па артыкуле 23.34 адміністрацыйнага кодэкса (незаконнае пікетаванне) у сувязі з правядзеннем 10 снежня ў Першамайскім раёне горада «акцыі цацак», і цяпер над ім павінен адбыцца суд. «Мы з адвакатам хадайнічалі, каб перанесці суд на заўтра, але ў суддзі заўтра шмат спраў, таму працэс прызначаны на 9.30 17 снежня», - паведаміў Вінаградаў.

10 снежня каля Нацыянальнай бібліятэкі актывісты «Zмены» выставілі мяккія цацкі з транспарантамі, у надпісах на іх былі дапушчаныя граматычныя памылкі: «Лшиь 1% балеусров знаиамют актвиуню гарджанксую поцизию», «Ншаи дпиолмы аб выесшм орбавзоании ня пизранются за гранцией», «Рбуль за год пдошевеел в три рзаа ", «Мнгоие берлаусы уежазют за гнраицу на зрабатоки», «Кое-кто у рлуя ўжо 18 гадоў», «12 гарджан Берласуи сиядт в тюмьрах за тое, што им не нвриатся десйвтущюий перзиндет». Падсумоўвае гэтыя тэзісы агульнае пытанне: «Как так почлуиолсь??».

Дэманстрацыя цацак доўжылася 15 хвілін, пасля чаго да бібліятэкі прыбылі супрацоўнікі міліцыі і «затрымалі» плюшавых маніфестантаў, павязучы іх з сабой.