Крыніца: ЕЗ пашырыць санкцыі супраць беларускай дыктатуры

Кіраўнікі МЗС 27 краін Еўразвяза ўхваляць пашырэнне «чорнага спісу» чыноўнікаў і кампаній Беларусі.

Адбудзецца гэта на паседжанні 27 лютага ў Брусэлі, паведаміла РІА Новости дыпламатычная крыніца ў ЕЗ.

«Чакаецца, што абмежавальныя меры закрануць новых чыноўнікаў і кампаніі», - сказаў суразмоўца агенцтва.

Рада Еўразвяза раней у лютым прыняла пастанову, якая адкрывае шлях для ўжывання дадатковых санкцый у дачыненні да фізічных і юрыдычных асоб у Беларусі, якія, на думку ЕЗ, датычныя да парушэнняў асноўных правоў чалавека ў краіне.

«Прынятымі папраўкамі пашыраюцца крытэры ўжывання абмежавальных мер і замарожвання актываў. Адпаведна, такія санкцыі могуць ужывацца да асоб, адказных за сур'ёзныя парушэнні правоў чалавека або падаўленне грамадзянскай супольнасці і дэмакратычнай апазіцыі, а таксама асоб і арганізацый, якія атрымліваюць прыбытак ад або якія падтрымліваюць рэжым Лукашэнкі», - гаварылася ў пастанове Рады ЕЗ.

Паводле інфармацыі, атрыманай РІА Новости з дыпламатычных крыніц, ЕЗ мае намер уключыць у спіс беларускіх чыноўнікаў, якім забаронены ўезд у краіны супольнасці і чые актывы павінныя быць замарожаныя, яшчэ 135 службовых асоб.

Што тычыцца таго, колькі беларускіх кампаній будуць унесеныя ў «чорны спіс», то, па словах, суразмоўцы агенцтва ў Радзе ЕЗ, «іх будзе некалькі».

Рада Еўразвяза па замежных справах у снежні 2011 года ўхваліла пашырэнне санкцый супраць Беларусі. Уезд у ЕЗ, такім чынам, быў забаронены больш чым 200 беларускіх чыноўнікаў. Акрамя таго, у ЕЗ замарожаныя актывы шэрагу беларускіх кампаній.