«Рэпарцёры без межаў»: Лукашэнка - адзін з найвялікіх ворагаў свабоды прэсы

Міжнародная праваабарончая арганізацыя «Рэпарцёры без межаў» асудзіла кампанію паклёпу БТ супраць Беларускай асацыяцыі журналістаў.

Як вынікае з заявы міжнародных праваабаронцаў, праваабарончая арганізацыя сур'ёзна паставілася да кампаніі, паклёпніцкі характар ​​якой нагадвае працэс над праваабаронцам Алесем Бяляцкім. Зараз жа яе мэтай стаў адзін з самых актыўных цэнтраў незалежнай журналістыкі ва Усходняй Еўропе, перадае «Радыё Свабода».

Дзейнасць БАЖ, падкрэсліваюць праваабаронцы, стала асабліва важнай пасля таго, як беларускія ўлады ў снежні 2010 года жорстка задушылі пратэсты грамадзянскай супольнасці і абмежавалі свабоду СМІ. Ціск на прадстаўнікоў недзяржаўных СМІ працягваўся і ў мінулым годзе, калі ў краіне больш за 100 журналістаў былі арыштаваныя і 34 асуджаныя на доўгія тэрміны зняволення. Па вызначэнні «Рэпарцёраў», Аляксандр Лукашэнка - адзін з найвялікіх ворагаў свабоды прэсы.

5 лютага ў праграме «У цэнтры ўвагі» Беларускае тэлебачанне зрабіла спробу дыскрэдытаваць Беларускую асацыяцыю журналістаў.

У фільме кіраўніцтва БАЖ абвінавацілі ў атрыманні грантаў ад амбасады Вялікабрытаніі. Былі паказаныя дакументы, якія нібыта сведчаць пра гэта, - без пячатак і подпісаў. Падставай для праграмы быў названы ананімны ліст ад нейкага былога сябра БАЖ, які абвінавачвае асацыяцыю ў нямэтавым выкарыстанні сродкаў.

У сюжэце пра БАЖ БТ выкарыстала здымкі схаванай камерай, чакала кіраўніка БАЖ на выхадзе з дому і на вуліцы пад снегам прасіла пракаментаваць нейкія паперы. Стваральнікі праграмы звярнуліся таксама да псіхіятра, які па відэа аналізаваў паводзіны чалавека.