Саміт ЕЗ: Курс на санкцыі будзе працягнуты

Еўрапейская Рада ўсё больш заклапочаная сітуацыяй у Беларусі.

Пра гэта заявіў у пятніцу на прэс-канферэнцыі ў Бруселі па выніках саміту ЕЗ кіраўнік Еўрарады Херман ван Рампей.

Адказваючы на ​​пытанне па Беларусі, ён зачытаў главу 36 заключнага дакумента саміту: «Еўрапейская Рада вітае меры, прынятыя Радай ЕЗ па замежных справах, які пашырыў спіс адказных за рэпрэсіі супраць грамадзянскай супольнасці і дэмакратычнай апазіцыі».

Ван Рампей патлумачыў, што гаворка ідзе аб забаронах на візы і замарожванні фінансавых актываў ў ЕЗ беларускіх чыноўнікаў, паведамляе «Інтэрфакс-Захад».

Згодна з заключным дакументам, саміт даручыў Радзе ЕЗ распрацаваць далейшыя санкцыі супраць Беларусі.

«Еўразвяз будзе развіваць дыялог з грамадзянскай супольнасцю Беларусі і падтрымліваць дэмакратычныя памкненні беларускага народа», - сказаў ван Рампей.

«Лідары ЕЗ выказваюць сур'ёзную занепакоенасць далейшым пагаршэннем сітуацыі ў Беларусі. Яны вітаюць рашэнне Рады ЕЗ пашырыць спіс асоб, адказных за рэпрэсіі ў дачыненні да грамадзянскай супольнасці і дэмакратычнай апазіцыі, а таксама за парушэнні асноўных правоў чалавека», - паведаміла БелаПАН Мая Качыянчыч, прэс-сакратар вярхоўнага прадстаўніка ЕЗ па замежных справах і палітыцы бяспекі Кэтрын Эштан.

У прынятай заяве еўрапейскія лідары таксама выказалі прыхільнасць супрацоўніцтву з грамадзянскай супольнасцю Беларусі і падтрымку дэмакратычным памкненням беларускага народа, адзначыла прадстаўніца вярхоўнага дыпламата ЕЗ.

Нагадаем, 27 лютага Рада міністраў замежных спраў краін ЕЗ прыняла рашэнне пашырыць спіс неўяздных у краіны Еўразвяза прадстаўнікоў беларускай дзяржавы, уключыўшы ў яго яшчэ 21 прозвішча. Гэта стала прычынай дыпламатычнага скандалу паміж Менскам і Бруселем. 28 лютага беларускія ўлады рэкамендавалі кіраўніку прадстаўніцтва Еўразвяза Майры Морэ і амбасадару Польшчы Лешаку Шарэпку «выехаць у свае сталіцы для кансультацый, каб давесці свайму кіраўніцтву цвёрдую пазіцыю беларускага боку аб непрымальнасці ціску і санкцый».

У адказ краіны ЕЗ адклікалі сваіх амбасадараў з Менска. Большасць еўрапейскіх дыпламатаў выехалі з Беларусі.