Яшчэ дзвюм незалежным журналісткам вынеслі папярэджанні

Гэта сябры ГА «БАЖ» Аліна Радачынская і Вольга Чайчыц.

Такім чынам, органы пракуратуры за гэты год вынеслі ўжо восем пісьмовых папярэджанняў журналістам, паведамляе прэс-служба «БАЖ».

Абедзвюх журналістак выклікалі на раніцу 28 сакавіка ў Пракуратуру г. Менска афіцыйнымі позвамі, дзе ўручылі пісьмовыя папярэджанні.

Дакументы адрозніваюцца толькі прозвішчамі журналістак - іх абвінавачваюць у супрацоўніцтве з тэлеканалам «Белсат» і папярэджваюць аб недапушчальнасці ажыццяўлення прафесійнай дзейнасці журналістаў замежных СМІ на тэрыторыі РБ без акрэдытацыі (п.4 арт. 35 закона «Аб СМІ»). Пад дакументам, датаваным 22 сакавіка, стаіць подпіс намесніка пракурора г. Менска К. Кежун.

Нагадаем, што такую ​​ж паперу атрымаў 2 сакавіка незалежны тэлеаператар і сябра ГА «БАЖ» Дзмітрый Краўчук.

Раней аналагічныя папярэджанні атрымалі:

Зміцер Кісель (Брэст) - 19 сакавіка (папярэджанне датаванае 27-м лютага); Гражына Шалкевіч (Гродна) - 27 лютага; Аляксандр Дзянісаў і Віктар Парфёненка (Гродна) - 21 лютага; Мікалай Дзятчэня (Гродна) - 16 лютага. Нядаўняі зварот ГА «БАЖ» у Гродзенскую пракуратуру ў сувязі з гэтымі падзеямі выніку не даў.

Акрамя таго, у 2012 годзе трое журналістаў атрымалі вусныя папярэджанні ад органаў КДБ: 30 студзеня - Гражына Шалкевіч, 22 лютага - стваральнік сайта «Свабодны рэгіён» з Полацка Яўген Парчынскі, а 28 лютага - Андрэй Мялешка.