Канцэрт гурта Neuro Dubel адменены

За дзень да правядзення сольнага канцэрту гурта Neuro Dubel дырэкцыя клуба «Салтайм» распаўсюдзіла афіцыйнае паведамленне аб адмене мерапрыемства.

«Шкадуем аб тым, што даводзіцца пра гэта паведамляць, але ні на што паўплываць не можам. Прыносім свае прабачэнні», - гаворыцца ў паведамленні.

Канцэрта ў «Салтайме» 8 сакавіка чакалі ўсе. Музыкі радаваліся рэдкай магчымасці выканаць старыя і паказаць новыя творы. Аляксандр Кулінковіч нават казаў, што гатовы паверыць, што забароны існуюць выключна ў галовах уладальнікаў пляцовак. Арганізатары радаваліся таму, што ніхто ім у жаданні зладзіць гэты канцэрт не пярэчыць - з упраўленнем культуры Менгарвыканкама правядзенне мерапрыемства было ўзгодненае. Ранейшыя канцэрты «Дзюбеля» у «Салтайме» заўсёды праходзілі з поспехам. У зусім невялікі клуб набівалася максімальна вялікая колькасць людзей і практычна ўсе квіткі замаўляліся загадзя, паведамляе «Тузін Гітоў».