Брата Бакіева будзе шукаць Інтэрпол

Зараз Жаныш Бакіеў знаходзіцца ў Беларусі.

Намеснік міністра ўнутраных спраў Кыргызстана Бактыбек Алымбекаў паведаміў аб тым, што брат Курманбека Бакіева Жаныш абвешчаны ў вышук Інтэрполам сёння на паседжанні шэрагу парламенцкіх камітэтаў, дзе абмяркоўваецца інфармацыя аб расследаванні падзей красавіка-чэрвеня 2010 года, піша партал KNews.

Ён распавёў, што Міністэрства ўнутраных спраў падрыхтавала і адправіла ў штаб-кватэру Інтэрпола матэрыялы і арыентоўку на экс-прэзідэнта Курманбека Бакіева, ягонага брата Жаныша, сыноў Марата і Максіма. Яны праходзяць падазраванымі па трагічных падзеях красавіка 2010 года.

Таксама былі адпраўленыя арыентоўкі на лідараў узбекскай дыяспары Кадыржана Батырава, Жалалідзіна Салахутдзінава, Карамата Абдулаева, Інамжана Абдрасулава, якія абвінавачваюцца ў арганізацыі міжэтнічнага канфлікту ў чэрвені 2010 года.

«Аднак Інтэрпол выдаў «чырвоны цыркуляр» (вышуковы бланк - заўв. рэд.) толькі на двух людзей: Жаныша Бакіева і Жалалідзіна Салахутдзінава. Па астатніх запытах нам было адмоўлена з-за недахопу прававой базы і падставаў для абвяшчэння ў вышук», - паведаміў Бактыбек Алымбекаў.

Ён дадаў, што, нягледзячы на гэта, Міністэрства ўнутраных спраў самастойна праводзіць следчыя мерапрыемствы для затрымання астатніх абвінавачаных.

Нагадаем, Жаныш і Курманбек Бакіевы знаходзяцца ў Беларусі пад заступніцтвам Аляксандра Лукашэнкі, які адмаўляецца выдаваць іх Кыргызстану.