Беларусы пікетавалі ў Варшаве Rаiffeisen Bank Polska (Фота)
5- 17.05.2012, 9:42
У Дзень беларускай салідарнасці 16 мая ў Варшаве адбыўся шэраг акцый пратэсту каля чатырох офісаў Rаiffeisen Bank Polska.
Усе чатыры пікеты прайшлі ў 16 гадзін адначасова. Варшаўскія беларусы заклікаюць кіраўніцтва Rаiffeisen Bank Polska спыніць супрацоўніцтва з дзяржаўнымі беларускімі банкамі, бо гэта апасродкавана падтрымлівае дыктатуру ў Беларусі і дапамагае рэжыму ўтрымацца на эканамічным плаву.
Каля двух месяцаў таму ААТ «Белаграпрамбанк» і Rаiffeisen Bank Polska SA падпісалі генеральнае крэдытнае пагадненне. Сённяшнія пікеты - гэта ўжо чацвёртая акцыя варшаўскіх беларусаў з мэтай спыніць крэдытаванне беларускага рэжыму.
- Мы ўпэўненыя, што ў рэшце рэшт вынік будзе - і польскае аддзяленне Rаiffeisen Bank адмовіцца ад гэтага супрацоўніцтва, як у канцы канцоў адмовіўся Deutsche Bank, - кажа адзін з удзельнікаў акцыі. - Мы лічым, што павінныя давесці да кліентаў і супрацоўнікаў Raiffeisen Bank Polska, што іх банк падтрымлівае беларускую дыктатуру. Крэдытаванне рэжыму - гэта крэдытаванне гвалту над беларусамі з боку ўладаў, крэдытаванне катаванняў палітвязняў у Беларусі.