КДБ: Тэрарыст спрабаваў падарваць аддзяленне міліцыі (Відэа)

(абноўлена) У Гомельскай вобласці затрыманы тэрарыст, які спрабаваў падарваць аддзяленне міліцыі ў адным з райцэнтраў рэгіёну.

Як паведамляе цэнтр інфармацыі і грамадскіх сувязяў (ЦІГС) КДБ Беларусі, мужчына быў затрыманы 24 мая каля 12.00 супрацоўнікамі МУС на месцы здзяйснення злачынства, якое кваліфікуюцца па ч. 1 арт. 14 і ч. 1 арт. 289 КК Беларусі (замах на здзяйсненне акта тэрарызму).

У масцы з надпісам на арабскай мове і з ужываннем ёмістасцяў з запальнай сумессю і самаробнай выбухной прылады магутнасцю каля пяці кілаграмаў у трацілавым эквіваленце ён «спрабаваў здзейсніць тэрарыстычныя дзеянні ў дачыненні да супрацоўнікаў падпаддзялення МУС па месцы іх дыслакацыі».

Дзе менавіта мужчына быў затрыманы, не ўдакладняецца. Паводле звестак БелаПАН, гэта адбылося ў Жлобіне.

Па факце здзяйснення злачынных дзеянняў УКДБ па Гомельскай вобласці распачатая крымінальная справа. Пачатае расследаванне сумеснай аператыўна-следчай групай КДБ і Следчага камітэта Беларусі.

«Атрыманыя першасныя дадзеныя паказваюць на наяўнасць сувязяў грамадзяніна з арганізаванай злачыннай групай па перапраўцы грамадзянаў Афганістана ў адну з еўрапейскіх краін. Звяртае на сябе ўвагу факт затрымання з прыцягненнем супрацоўнікаў спецпадпаддзялення ў паказаным рэгіёне ў маі бягучага года аднаго з лідараў арганізаванай злачыннай групы», - гаворыцца ў паведамленні ЦІГС КДБ.

Як пазней паведамілі ў КДБ, грамадзянін Беларусі, які здзейсніў спробу выбуху самаробнай выбухной прылады ў Гомельскай вобласці, аказаў супраціў пры затрыманні.

У яго канфіскавалі прамысловую выбухоўку і элементы паражэння.

«У зламысніка, які зрабіў спробу здзейсніць тэракт у будынку міжраённага аддзела ГУБАЗ па Гомельскай вобласці, канфіскаваны Аманал і дзівяць элементы - рэзаныя цвікі", - паведамілі ў праваахоўных органах.

Зламыснік быў затрыманы супрацоўнікамі міжраённага аддзела ГУБАЗ, «калі ён паспрабаваў злучыць правады на выбуховай прыладзе». «Перад гэтым ён кінуў бутэльку ў будынак - верагодна, з мэтай адцягнуць увагу супрацоўнікаў міліцыі, каб потым прывесці ў дзеянне выбуховае прыстасаванне», удакладнілі ў праваахоўных органах.

Затрыманым з'яўляецца мясцовы непрацуючы жыхар 1991 года нараджэння.

«Ніякіх патрабаванняў ён не вылучаў. Пакуль што аб матывах ягоных дзеянняў казаць рана. З ім працуюць следчыя, ён будзе адпраўлены на псіхолага-псіхіятрычную экспертызу», - сказалі ў праваахоўных органах.

«Выбуховую прыладу і кінутую ім бутэльку з «кактэйлем Молатава» адправілі экспертам», - паведамілі там.