Васіль Парфянкоў: Спадзяюся, што застануся на волі
1- 6.06.2012, 10:49
Палітвязень падае касацыйную скаргу на прысуд і разлічвае на амністыю.
На мінулым тыдні Васіля Парфянкова зноў асудзілі, піша «Наша Нiва». Цяпер ён павінен правесці пад арыштам паўгады. Пад варту яго не ўзялі, пакуль прысуд не ўступіў у законную сілу. Але Васіль спадзяецца, што за краты яго ўсё-такі не адправяць.
«Мы будзем падаваць касацыйную скаргу. Спадзяюся, што я патраплю пад закон «Аб амністыі».
Падставай для новай крымінальнай справы стала парушэнне прэвентыўнага нагляду Парфянкова. Са студзеня, калі гэты нагляд за ім усталявалі, ён двойчы адсутнічаў дома, калі прыходзілі міліцыянты - выходзіў у краму. І яшчэ адзін раз спазніўся на праверку. Ці магчыма было пазбегнуць такіх парушэнняў?
«Складана іх не дапусціць, - лічыць Васіль. - Немагчыма з 20.00 да раніцы стала знаходзіцца дома. Я малады чалавек, у мяне ёсць нейкія справы, якія трэба вырашаць».
Увесь той няпоўны год, які былы палітвязень правёў на волі, ён спрабаваў працаўладкавацца.
«Але мяне не хацелі нідзе браць, таму што ў мяне судзімасць за Плошчу. Усюды казалі, што ім не патрэбныя праблемы».
А калі ўсё ж такі давядзецца зноў апынуцца за кратамі, то просіць яму пісаць лісты. Паводле яго, гэта была самая адчувальная падтрымка ў няволі.