Асад паранены і ўцёк з Дамаска

(абноўлена) Сірыйскі дыктатар мог атрымаць раненне падчас тэракту, які адбыўся ў сераду ў Дамаску.

Пра гэта паведамляе «Інтэрфакс» са спасылкай на лонданскую газету Guardian. Паводле яе даных, Башар Асад пакінуў Дамаск і вылецеў на асабістым самалёце ў горад Латакія, размешчаны на міжземнаморскім узбярэжжы непадалёк ад порта Тартус.

Паводле гэтых дадзеных, Асад, які ўжо другі дзень не з'яўляецца на людзях, цяпер кіруе аперацыяй па падаўленні паўстання менавіта з Латакіі. Некаторыя крыніцы дапускаюць, што ён мог пакінуць Дамаск яшчэ да ўчорашняга выбуху, які забраў жыцці чатырох яго набліжаных, уключаючы зяця Асіфа Шауката. Апазіцыянеры таксама заяўляюць, што лёс брата прэзідэнта - Махера Асада - таксама застаецца невядомым, паведамляе Lenta.ru.

Пацверджання інфармацыі аб уцёках прэзідэнта са сталіцы з незалежных крыніц не паступала, аднак у Дамаску ўжо распаўсюдзіліся чуткі аб тым, што і яго сям'я вывезена ў больш бяспечнае месца.

Днём раней паўстанцы паспяхова правялі аперацыю па ліквідацыі чатырох чалавек, якія адказваюць за сілавое падаўленне паўстання ў Сірыі. Акрамя Шауката, які каардынаваў ваенную аперацыю, былі забітыя міністр абароны Дауд Раджыха, кіраўнік МУС Мухамад аш-Шаар, а таксама памочнік віцэ-прэзідэнта па пытаннях бяспекі Хасан Туркмані. Мноства іншых чыноўнікаў сірыйскіх сілавых ведамстваў атрымалі раненні і былі дастаўленыя ў бальніцы.

Навіны аб гібелі адразу чатырох чалавек з бліжэйшага акружэння Башара Асада выклікалі святкаванні і народныя гулянні ў многіх сірыйскіх гарадах. Акрамя таго, паўстанцы заявілі, што гэтая аперацыя - толькі пачатак, а канчатковай іх мэтай з'яўляецца ліквідацыя самога прэзідэнта.

Тым часам баі ў Дамаску, што пачаліся пяць дзён таму, не спыняюцца. Сутыкненні, у якіх гінуць дзясяткі людзей, ідуць адразу ў некалькіх раёнах сірыйскай сталіцы.