На сесіі ПА АБСЕ будзе абмяркоўвацца сітуацыя ў Беларусі

Дэлегаты ХХI сесіі Парламенцкай асамблеі АБСЕ, якая адкрываецца сёння ў Манака, абмяркуюць у ліку іншых пытанняў сітуацыю ў Беларусі.

На сесіі будуць заслуханы два праекта рэзалюцыі па Беларусі. Адзін з іх прадставіць беларуская «парламенцкая» дэлегацыя на чале з намеснікам старшыні «палаты прадстаўнікоў» Віктарам Гумінскім, піша БелаПАН.

Як паведаміў спікер ніжняй палаты беларускага «парламента» Ўладзімір Андрэйчанка, афіцыйная рэзалюцыя «датычыцца развіцця новых выглядаў энергетыкі». «Другая рэзалюцыя — супраць нас, яна падрыхтавана брытанскімі парламентарамі, носіць аднабаковы і тэндэнцыйны характар. Мы хочам, каб яна не была прынята», — заявіў Андрэйчанка.

Нагадаем, праект альтэрнатыўнай рэзалюцыі быў распаўсюджаны 27 чэрвеня сакратарыятам ПА АБСЕ. Дакумент рэкамендуе адмовіцца ад правядзення ў Беларусі чэмпіянату свету па хакеі 2014 года, калі ўлады не вызваляць усіх палітвязняў.

Рэзалюцыя заклікае афіцыйны Менск паважаць вяршэнства закона, свабоду СМІ і перамяшчэння, спыніць пераследы актывістаў незалежных прафзвязаў і праваабаронцаў, дазволіць правядзенне міжнароднага расследавання інфармацыі пра катаванні ў турмах, вярнуцца да разгляду заявак на рэгістрацыю партыі «Беларуская хрысціянская дэмакратыя» і праваабарончага цэнтра «Вясна», якім неаднакратна ў гэтым адмаўлялі.

Па дадзеных сакратарыята Парламенцкай асамблеі, суаўтарамі праекта сталі больш 60 парламентароў з 21 дзяржавы.

У ПА АБСЕ ўваходзяць 320 парламентароў з 55 краін Еўропы, Цэнтральнай Азіі і Паўночнай Амерыкі. Асамблея прадастаўляе платформу для міжпарламенцкай дыпламатыі, вядзе назіранне за выбарамі і ўмацоўвае міжнароднае супрацоўніцтва для выканання абавязкаў па палітычных, эканамічных і экалагічных пытаннях, а таксама па бяспецы і правам чалавека.