Леў Марголін стаў выязным
- 14.08.2012, 10:35
Пасля пяці месяцаў знаходжання ў спісе «невыязных» высветлілася, што падстаў для гэтага абмежавання ў дачыненні да намесніка старшыні АГП няма.
Пра гэта 13 жніўня ва «урачыстай» абстаноўцы ў будынку Маскоўскага раённага суда г. Менска паведаміў Льву Марголіну прадстаўнік Міністэрства ўнутраных спраў і выдаў адпаведны дакумент.
- Не факт, што я не з'яўлюся ў гэтым спісе праз нейкі час, але на сённяшні дзень - падзея даволі прыемная, - адзначыў намеснік старшыні Аб'яднанай грамадзянскай партыі ў інтэрв'ю ucpb.org.
Нагадаем, 23 сакавіка Леў Марголін атрымаў даведку з Барысаўскага РУУС аб тым, што яму забаронены выезд за межы Беларусі. Намесніка старшыні АГП зрабілі невыязным з прычыны «прад'яўлення грамадзянскага пазову ў судзе», аб якім ён нічога не чуў. За апошнія паўгады ў спісе «невыязных» па розных прычынах апынуўся шэраг беларускіх праваабаронцаў, палітыкаў і журналістаў.