З «Ітэрай» канчаткова развіталіся
19- 16.08.2012, 10:57
Лукашэнка даручыў скасаваць дамову аб будаўніцтве «Менск-сіці».
Інвестдамова паміж Беларуссю і сумесным таварыствам з абмежаванай адказнасцю «Менск-сіці», асноўным заснавальнікам якога з'яўляецца група кампаній «Ітэра», аб будаўніцтве «Менск-сіці» скасоўваецца. Прычына - немагчымасць яго рэалізацыі інвестарам ва ўстаноўленыя тэрміны, паведамляе БелТА.
З 1 верасня прызнаецца страціўшым сілу ўказ ад 21 красавіка 2009 года № 216 «Аб некаторых мерах па рэалізацыі інвестыцыйнага праекта «Дзелавы цэнтр «Менск-Сіці».
Прынята рашэнне знайсці новага інвестара для рэалізацыі гэтага праекта.
«Менск-сіці» - шматфункцыянальны комплекс у Менску. На тэрыторыі ў 318 га будуць размешчаны жылы раён, аб'екты камерцыйнай нерухомасці і адміністрацыйныя будынкі. Праект выставяць на міжнародны конкурс. Акрамя таго, прэзентацыя пляцоўкі адбудзецца на інвестыцыйным форуме, які пройдзе ў Менску ў лістападзе бягучага года.