Гомельскі гарвыканкам: Мэр не арыштаваны і заўтра прыступіць да працы

Пасля таго, як інфармацыю аб арышце старшыні Гомельскага гарвыканкама Віктара Піліпца распаўсюдзілі многія СМІ, гарадскія ўлады выступілі з аспрэчаннем.

«Гомельскі гарадскі выканаўчы камітэт афіцыйна заяўляе аб тым, што інфармацыя, размешчаная на беларускім партале TUT.BY ад 6 жніўня 2012 года адносна мэра горада непраўдзівая. Старшыня гарвыканкама Піліпец Віктар прыступае да выканання сваіх абавязкаў 7 жніўня 2012 года пасля заканчэння працоўнага водпуску», - гаворыцца ў паведамленні гарвыканкама.

Раней у Гомельскім гарвыканкаме нічога не каментавалі, хоць чуткі аб арышце Віктара Піліпца мусіраваліся ўжо тыдзень. Выказваліся здагадкі, што затрыманне можа быць звязана з нядаўнім арыштам Камітэтам дзяржбяспекі службовых асоб упраўлення капітальнага будаўніцтва (УКБ) Гомельскага гарвыканкама. Чыноўнікі падазраюцца ў перавышэнні службовых паўнамоцтваў - у тым, што размяркоўвалі кватэры па заніжаных коштах сваім сваякам і калегам, піша БелаПАН.

Паводле звестак КДБ, у 2011 годзе службовымі асобамі УКБ з парушэннем дзеючага заканадаўства былі размеркаваныя 25 кватэр у чатырох жылых дамах, першапачаткова прызначаных для грамадзян, домаўладанні якіх падлягалі зносу ў сувязі з адабраннем зямельных участкаў для дзяржаўных патрэб. Паказаныя кватэры былі размеркаваны сярод работнікаў УКБ, іх сваякоў і знаёмых па коштах у некалькі разоў ніжэй рынкавага кошту жылля.

У КДБ і МУС звесткі аб арышце кіраўніка Гомеля таксама не пацвердзілі.