Ермакова загадала ЗВР павялічыцца ў 2,5 разы

Золатавалютныя рэзервы ў Беларусі не павінны быць ніжэй за $8 млрд.

Аб гэтым заявіла сёння старшыня праўлення Нацыянальнага банка Надзея Ермакова на пасяджэнні Савета Міністраў, перадае БелТА.

«Улічваючы знешнеэканамічныя рызыкі, а таксама будучыя выплаты ўрада і Нацбанка па абавязацельствах у замежнай валюце, якія адбудуцца да канца года, неабходна прыняць дадатковыя меры па недапушчэнню зніжэння золатавалютных рэзерваў ніжэй за $8 млрд», - сказала Надзея Ермакова. У сувязі з гэтым выкананне ўсіх умоў і параметраў праграмы мер, якія падтрымліваюцца Антыкрызісным фондам, важна не толькі з пункту гледжання паступлення чарговага транша. Гэта таксама неабходна для стварэння спрыяльнага фону для прыцягнення інвестыцый.

Надзея Ермакова падкрэсліла, што ў адпаведнасці з Праграмай сацыяльна-эканамічнага развіцця Беларусі на 5 гадоў золатавалютныя рэзервы да канца 2015 года павінны скласці аб'ём трохмесячнага імпарту. У цэлым да 2015 года ЗВР павінны дасягнуць $18 млрд. Такім чынам, за тыя, што засталіся тры гады, яны павінны павялічыцца амаль у 2,5 разы.

Па словах старшыні праўлення Нацбанка, ужо ў 2013 годзе неабходна забяспечыць паступленне рэзерваў не менш як на $700 млн. У той жа час у 2013 годзе трэба будзе пагасіць абавязацельствы перад унутранымі і вонкавымі крэдыторамі на больш чым $4 млрд.

Нягледзячы на прагназуемае ў наступным годзе дадатнае сальда знешняга гандлю таварамі і паслугамі, запатрабуецца $3,9 млрд. для пералічэння мытных пошлін на нафтапрадукты ў бюджэт Расеі.

У якасці асноўных крыніц паступлення валюты ў краіну, без уліку валютнай выручкі, прадугледжваецца прыцягненне прамых замежных інвестыцый у памеры $4,5 млрд. Таксама прадугледжана паступленне двух траншаў крэдыту ад Антыкрызіснага фонду ЕўрАзЭС на $880 млн.