Гары Паганяйла: Галоўны карупцыянер - гэта Лукашэнка
14- 27.09.2012, 15:18
Улада саджае толькі тых чыноўнікаў, злачынствы якіх ужо немагчыма схаваць, лічыць праваабаронца.
Беларускія чыноўнікі загразлі ў карупцыі, а праваахоўныя органы і судовая сістэма іх пакрывае. Пра гэта сайту charter97.org заявіў кіраўнік юрыдычнага аддзела беларускага аддзялення БХК Гары Паганяйла, каментуючы апошнія арышты беларускіх чыноўнікаў.
«Гэта проста перманентная дзейнасць, звязаная з тым, што чынавенства загразла ў карупцыі. Там, дзе канцы злачынстваў чыноўнікаў відавочна агаляюцца, улада вымушана прыняць меры. Хоць усе гэтыя карупцыянеры выгадаваны выбудаванай Лукашэнкам вертыкаллю», - распавёў Гары Паганяйла.
«Рэальных мер па барацьбе з карупцыяй, акрамя пасадак, мы не бачым. То аднаго, то іншага чыноўніка розных калібраў адпраўляюць на нары - ад старшыні сельсавета да члена адміністрацыі Лукашэнкі. Але карупцыя была, ёсць і будзе, пакуль не з'явіцца адданасць закону, а не свайму гаспадару», - адзначыў юрыст.
«Праваахоўныя органы ў нас таксама карумпаваныя і пакрываюць чынавенства. Толькі тады, калі чыноўнік становіцца бяльмом у воку, калі яго злачынствы ўжо немагчыма схаваць, яго аддаюць на з'ядзенне», - лічыць праваабаронца.
«А грамадства думае, што ідзе барацьба з карупцыяй, што злачынцаў караюць, што для Лукашэнкі не важна, якога ўзроўню чыноўнік, ён саджае нават людзей са свайго апарата. А на самой справе, Лукашэнка - першы карупцыянер», - падкрэсліў Гары Паганяйла.
«Нашы суды таксама карумпаваныя і такім жа чынам глядзяць на становішча спраў. Калі судзяць буйнога чыноўніка, то ён караецца невялікім тэрмінам або штрафам, выходзіць па амністыі альбо ж яго наогул вызваляюць ад адбыцця пакарання, як ужо было», - заўважыў юрыст.
«Усё становішча ў дзяржаве спрыяе разрастанню карупцыі, і такія прыклады, як арышт Піліпца, Баранава і Пракапенкі, кажуць пра тое, што карупцыя квітнее махровымі кветкамі. Бо сёння нават памочнік прэзідэнта не можа ўтрымацца ад злачынства», - сказаў праваабаронца.
Нагадаем, у рамках справы аб кватэрных махінацыях ў гомельскім УКСе нядаўна былі арыштаваныя былы старшыня Гомельскага гарвыканкама Віктар Піліпец, першы намеснік старшыні аблвыканкама Аляксандр Баранаў і былы памочнік Лукашэнкі, галоўны інспектар па Гомельскай вобласці Ігар Пракапенка.
21 верасня Лукашэнка заявіў, што пасадзіць карумпаваных чыноўнікаў разам з іх сем'ямі.
«Некаторыя чыноўнікі, як гэта здарылася ў Гомелі, бралі дзесяткамі кватэры і перапрадавалі, а грошы клалі сабе ў кішэню. Сёння крымінальная справа заведзеная, і не адзін чыноўнік са сваімі сваякамі і набліжанымі сядуць на лаву падсудных», - сказаў дыктатар.