Расея абяцае дапамагчы Беларусі на шляху да СГА
14- 6.09.2012, 13:05
Расея гатовая аказаць комплексную падтрымку Беларусі па далучэнні да Сусветнай гандлёвай арганізацыі.
Пра гэта заявіў старшы саветнік пасольства РФ у Менску Валерый Бандарэнка.
«У Менску абгрунтавана разлічваюць на аказанне Расеяй садзейнічання ў вырашэнні пытанняў, якія спрыяюць далучэнню Беларусі да гэтай арганізацыі. Перш за ўсё, мы бачым тут неабходнасць аказання дапамогі нашым партнёрам у зняцці палітычных перашкод, прадастаўленні з нашага боку кансультатыўна-экспертнага садзейнічання пры падрыхтоўцы беларускім бокам дакументаў», - адзначыў расейскі дыпламат у інтэрв'ю агенцтву «Інтэрфакс-Захад».
Таксама, па словах Бандарэнкі, размова таксама можа ісці «аб выдзяленні дадатковай тэхнічнай дапамогі на гэтыя мэты».
Між тым, прадстаўнік амбасады РФ сказаў, што беларускім бокам выяўляецца і пэўная заклапочанасць у сувязі з уступленнем Расеі ў СГА. «Гучаць асцярогі, напрыклад, што, застаючыся па-за рамкамі СГА, Беларусь сутыкнецца з неабходнасцю прытрымлівацца правілаў СГА, не маючы пры гэтым права апеляцыі да ахоўных судовых інстытутаў Арганізацыі ў выпадку дыскрымінацыі з боку трэціх дзяржаў» - удакладніў В.Бандарэнка.
Пры гэтым ён растлумачыў, што «цяпер у цэлым сярэдні выніковы ўзровень тарыфнай абароны, які ўзгоднены Расеяй з СГА, сумяшчальны з эканамічнымі інтарэсамі Беларусі». «Паколькі пераважная колькасць тарыфных ліній пры фарміраванні Адзінага мытнага тарыфу ў рамках Мытнага саюза адпрацавана, то гэта азначае, што Беларусь прыняла ў гэтым кантэксце ўзровень расейскіх тарыфных ставак», - заявіў дыпламат.
Падтрымка Беларусі з боку Расеі ў гэтым годзе ўжо ацэньваецца на ўзроўні больш $6 млрд, таксама заявілі ў расейскай амбасадзе ў Менску.
«Напрыклад, толькі ў гэтым годзе Беларусь, за кошт істотна зніжаных коштаў на газ, бесперашкодных паставак нафтапрадуктаў і стварэння іншых спрыяльных умоў, ужо атрымала дадаткова больш за $ 6 млрд», - заявіў старэйшы дарадца амбасады РФ у Беларусі Валерый Бандарэнка.