Еўрадэпутаты намагаюць сустрэчы з беларускімі палітвязнямі
13- 4.10.2013, 20:42
- 9,737
Дэлегацыя Еўрапарламента ў канцы кастрычніка плануе прыехаць у Беларусь.
Чацвёра дэпутатаў правядуць сустрэчы з прадстаўнікамі Міністэрства замежных спраў, міністрамі юстыцыі і ўнутраных спраў, а таксама з прадстаўнікамі грамадзянскай супольнасці. Найважнейшая мэта паездкі - сустрэча з палітвязнямі, паведамляе «Радыё Рацыя».
Для яе патрэбная згода беларускага боку. Пра гэта сказаў старшыня дэлегацыі Еўрапарламента ў сувязях з Беларуссю Філіп Качмарак.
«Мы папрасілі аб такой магчымасці. Да беларускага боку мы звярнуліся з лістом. Калі мы не атрымаем дазвол на сустрэчу з палітзняволенымі, то сустрэнемся з іх сем'ямі. Гэта будзе толькі палавіністым поспехам з нашага боку», - заявіў ён.
Першы сакратар беларускай амбасады ў Брусэлі, дзе ўзгадняецца план паездкі еўрадэпутатаў, адзначыў, што пытанне наведвання імі палітвязняў не разглядаецца.
«Гэтае пытанне не падымалася, бо гэта супярэчыць усяму нашаму заканадаўству. І такія пытанні не развязваюцца на маім узроўні і на ўзроўні амбасады. Тут трэба выканаць пэўныя юрыдычныя працэдуры. Таму я не магу нешта каментаваць ці рабіць нейкія прагнозы», - сказаў ён.
Запланаваная на ліпень паездка еўрапарламентарыяў у Беларусь была адтэрмінаваная, бо беларускі бок запатрабаваў у якасці ўмовы правесці сустрэчы з «дэпутатамі» непрызнанай Еўразвязам «палаты прадстаўнікоў».
Нагадаем, у беларускіх турмах і калоніях цяпер знаходзяцца больш за дзесяць палітычных вязняў.