У аварыі з аўтобусам у Менску пацярпелі 15 чалавек

Трое чалавек застаюцца ў шпіталях.

З прычыны ДТЗ з удзелам пасажырскага аўтобуса, якое адбылося 7 кастрычніка на праспекце Дзяржынскага ў Менску, былі шпіталізаваныя 3 чалавекі, траўмы астатніх пасажыраў апынуліся нязначнымі. Пра гэта БелТА паведаміла кіраўнік прэс-службы Дзяржаўтаінспекцыі Менска Таццяна Харлінская.

«Адразу пасля аварыі ў розныя лячэбныя ўстановы сталіцы былі дастаўленыя 15 чалавек. Аднак толькі трое пасля былі шпіталізаваныя. Астатніх адпусцілі дадому пасля таго, як іх агледзелі лекары. На шчасце, траўмы большасці апынуліся не такімі сур'ёзнымі», - распавяла Таццяна Харлінская. Шпіталізаваная жанчына 1960 года нараджэння - у яе чэрапна-мазгавая траўма сярэдняй ступені цяжкасці. Таксама чэрапна-мазгавая траўма (але лёгкай ступені цяжкасці) ў мужчыны 1950 года нараджэння, якога таксама вырашылі часова пакінуць пад наглядам лекараў. І нарэшце, з падазрэннем на пералом нагі была шпіталізаваная дзяўчына 1985 года нараджэння, аднак яе дыягназ застаецца пад пытаннем.

У цяперашні час удакладняюцца прычыны таго, што адбылося. «Як патлумачыў сам кіроўца, ён праехаў па сваім маршруце метраў 300, пасля чаго яму стала дрэнна, пацямнела ў вачах і ён страціў прытомнасць», - распавяла Таццяна Харлінская. Пры гэтым кіроўца распавёў інспектарам ДАІ, што перад выездам на маршрут адчуваў сябе добра і не адчуваў недамаганняў.

Нагадаем, 7 кастрычніка кіроўца пасажырскага аўтобуса падчас руху па праспекце Дзяржынскага ў Менску страціў прытомнасць і ўрэзаўся ў адну з асвятляльных мачтаў. ДТЗ адбылося каля 17.40. Нейкі час на месцы аварыі былі перашкоды руху, аднак неўзабаве ён быў адноўлены ў поўным аб'ёме.

Фота: onliner.by