Знешні гандаль упершыню сышоў у мінус

Сальда знешняга гандлю таварамі і паслугамі ўпершыню за некалькі гадоў склалася адмоўным.

Традыцыйны мінус у знешнім гандлі таварамі не змог выцягнуць гандаль паслугамі і па папярэдніх выніках студзеня-жніўня 2013 года сальда склала мінус $125,3 млн., паведамляе прэс-служба Нацбанка Беларусі.

Для параўнання, за той жа перыяд 2012 года сальда знешняга гандлю таварамі і паслугамі было станоўчым і складала больш за $4 млрд.

Знешнегандлёвы абарот тавараў і паслуг за студзень-жнівень 2013 года скараціўся на 13,8% і склаў $60 008,3 млн., пры гэтым экспарт тавараў і паслуг скараціўся на 18,6% да $29 941,5 млн., а імпарт - усяго на 8,3% да $30 066,8 млн.

Знешнегандлёвы абарот тавараў і паслуг не ўлічвае абавязацельствы Беларусі па пераліку экспартнай пошліны на нафтапрадукты ў бюджэт Расеі. Для параўнання, у мінулым годзе ў расейскі бюджэт было выплачана $3,8 млрд вывазных мытных пошлін.